पाचोरा (प्रतिनिधी) दुचाकी, चारचाकी वाहनांचे व मोठ्या वस्तूंचे आमिष दाखवून लकी ड्रॉ व बक्षिसांची भव्य सोडतीच्या नावाखाली पाचोऱ्यात लाखो रुपयांची फसवणूक करत तसेच कोणतीही बक्षीस वा वस्तू न देता आरोपींनी पोबरा केल्याची घटना येथील साईमोक्ष रिसॉर्ट अँड लॉन्स येथे घडली आहे. याप्रकरणी पाचोरा पोलिसांनी तिघांना ताब्यात घेतले आहे.
श्री महालक्ष्मी एंटरप्राइजेस या नावाखाली पत्रक छापून त्यावर रजिस्ट्रेशन नंबर टाकून दुचाकी व चारचाकी वाहनांची, मोठ्या वस्तूंची छायाचित्र छापून बक्षिसांची लयलूट म्हणून १ हजार ५०० रूपयांच्या कुपनचे पत्रक छापले होते. त्यावर बक्षिसांची भव्यतम सोडत म्हणून पाचोरा शहर व तालुक्यातील नागरिकांना ५ हजार ५५५ कुपन वितरित करून कोट्यावधीची माया जमा केली. दरम्यान, २९ रोजी पाचोरा, वरखेडी रोडवरील साईमोक्ष रिसॉर्ट अँड लॉन्स या कार्यालयात भव्यतम सोडतचे आयोजन केले होते.
या ठिकाणी श्री महालक्ष्मी एंटरप्राइजेसचे संचालक अरुण आहेर, फरीद शेठ, आकाश पाटील, संजय पाटील, पुंडलिक कदम, मिलिंद संसारे, दिनेश व्यवहारे, ज्ञानेश्वर जेटे या पत्रकावर असलेल्या नावांचे संचालकांची तेथे उपस्थिती होती. मात्र, त्यांनी नागरिकांना कोणत्याही प्रकारची बक्षीस न देता लोकांचा जमाव पाहून तेथून पळ काढला. यावरून नागरिकांना आपली फसवणूक झाल्याचे लक्षात आले.
याप्रकरणी ज्ञानेश्वर चिंतामण खैरनार (रा. शेवाळे, ता. पाचोरा) यांनी पाचोरा पोलीस निरीक्षक यांच्याकडे रितसर तक्रार दाखल केली आहे. तसेच किरण निंबा चौधरी (पाचोरा), संतोष मधुकर चंदने (रा. निंभोरी बुद्रुक, ता. पाचोरा), राजेंद्र सांडू पाटील (रा. लोहारी बुद्रुक, ता. पाचोरा) यांनीही या संदर्भात पाचोरा पोलिसांत तक्रार दिली आहे. दरम्यान, याप्रकरणी पाचोरा येथील पोलीस निरीक्षक अशोक पवार यांच्याशी संपर्क केला असता या कोट्यावधीच्या लकी ड्रॉचा प्रकार साई मोक्ष रिसॉर्ट येथे झाल्याचे पोलिसांना कळाले होते. या संदर्भात तक्रार प्राप्त झाली असून योग्य चौकशी करून संबंधितांवर फसवणुकीचा गुन्हा दाखल करण्यात येईल. दरम्यान, साई मोक्ष रिसॉर्ट या ठिकाणी असा अवैध लकी ड्रॉला जागा कशी उपलब्ध करून दिली ? तसेच हा प्रकार घडला असताना पोलिसांनी येऊनही संबंधितांना अटक का केली नाही? असा प्रश्न उपस्थित होत आहे.
धुळे जिल्ह्यातही सुरु आहे अवैध धंद्याचे रॅकेट !
लकी ड्रॉ चालवणारे संचालक हे बाहेर जिल्ह्यातही सुरु आहे. त्यातील पुंडलिक सांडू कदम (रा. तिडका, ता. सोयगाव), स्नेहल दत्तात्रय नरोटे (रा. कोल्हार, ता. राहुरी, जि. नगर) व त्याचा भाऊ श्रेयस मराठी यांना पोलिसांनी ताब्यात घेतले आहे. हे अवैध धंद्याचे रॅकेट धुळे जिल्ह्यात ही सुरू या एजंटांनी सांगितले.
