पाचोरा (प्रतिनिधी) – शहरातील समर्थ व्हॅली परिसरातील बंद घराचे कुलूप तोडून अज्ञात चोरट्याने घरातील २० हजार रुपये रोख व ४५ हजारांचे दागिने असा ६५ हजाराचा मुद्देमाल लंपास केल्याची घटना घडली. याप्रकरणी पाचोरा पोलिस ठाण्यात गुन्हा नोंदवण्यात आला आहे.
पाचोऱ्यातील समर्थ व्हॅली येथे सुधाकर पोपट सूर्यवंशी हे आपल्या परिवारासह वास्तव्यास आहेत. सुधाकर सूर्यवंशी हे खासगी नोकरीनिमित्त मुंबई येथे असतात. तर त्यांची पत्नी व मुले समर्थ व्हॅली येथे राहतात. दरम्यान, ६ जून रोजी दुपारी ३ वाजता प्रियंका सूर्यवंशी या आई व मुलांसह जळगाव येथे धोंड्याच्या कार्यक्रमासाठी घराला कुलूप लावून गेल्या होत्या. ७ जून रोजी सकाळी ५ वाजेच्या सुमारास प्रियंका सूर्यवंशी यांचा मावसभाऊ जयेश राजेंद्र पवार यांनी भ्रमणध्वनीद्वारे तुमच्या घराचा कडी कोयंडा तुटलेला आहे, असे सांगितले. ही माहिती मिळताच प्रियंका सूर्यवंशी पाचोरा येथे आल्यात. या वेळी त्यांना घरातील साहित्य अस्ताव्यस्त फेकलेले आढळले. तर गोदरेज कपाट उघडून पाहिले असता त्यातील ३० हजारांची १ तोळा वजनाची सोन्याची पोत, १५ हजाराच्या ५ ग्रॅम व ३ ग्रॅम वजनाच्या दोन अंगठ्या व २० हजार रुपये रोख असा ६५ हजाराचा मुद्देमाल अज्ञात चोरट्याने चोरुन नेल्याचे उघड झाले. याप्रकरणी पाचोरा पोलिस ठाण्यात प्रियंका सूर्यवंशी यांच्या फिर्यादीवरून अज्ञात चोरट्याविरुद्ध गुन्हा नोंदवण्यात आला आहे. तपास पो.नि. राहुलकुमार पवार यांच्या मार्गदर्शनात पो.हे.कॉ. वसीम शेख करत आहेत.
