अमळनेर (प्रतिनिधी) – तालुक्यातील रोटवद येथील रहिवासी तथा डॉ. विजय नवल पाटील आर्मी स्कूलमधील कर्मचारी चेतन शांताराम महाजन (वय ३७) यांचा दुर्दैवी अपघाती मृत्यू झाल्याची घटना ८ रोजी रात्री ८ ते ९ वाजेदरम्यान घडली. दरम्यान, चेतन महाजन हे आपल्या दीड वर्षांच्या मुलासाठी अमळनेरच्या बाजारातून आंबे आणि पाणीपुरी घेऊन घरी परतत असताना झालेल्या अपघातात त्यांचा मृत्यू झाला.
चेतन महाजन हे अमळनेर येथील डॉ. विजय नवल पाटील आर्मी स्कूलमध्ये शिपाई पदावर कार्यरत होते. अतिशय मनमिळावू, कष्टाळू आणि सर्वांना मदत करणारा युवक अशी त्यांची ओळख होती. दररोज ते आपल्या हिरो स्प्लेंडर प्लस (एमएच १९, डीटी ५२४०) या दुचाकीने रोटवद ते अमळनेर असा प्रवास करत असत. तर, चेतन महाजन हे यशवंतराव चव्हाण महाराष्ट्र मुक्त विद्यापीठाच्या पदवी परीक्षेसाठी ८ जून रोजी दुपारी अमळनेर येथे आले होते. परीक्षा पूर्ण झाल्यानंतर त्यांनी बाजारात खरेदी केली आणि सायंकाळी घरी जाण्यासाठी निघाले. सायंकाळी ७.३० वाजेच्या सुमारास त्यांची पत्नी कोमल महाजन यांनी त्यांना मोबाईलवर संपर्क साधून घरी येण्याबाबत विचारणा केली. त्यावेळी चेतन महाजन यांनी आपण दहिवद फाटा पार केला असून अवघ्या १५ ते २० मिनिटांत रोटवद येथे पोहोचणार असल्याचे सांगितले. मात्र, त्यानंतर त्यांचा मोबाईल बंद झाला आणि ते घरी ही पोहोचले नाहीत. रात्री उशिरापर्यंत चेतन महाजन यांचा काहिही संपर्क होत नसल्याने कुटुंबीय चिंतेत पडले. त्यामुळे नातेवाईक आणि मित्रांनी तातडीने शोधमोहीम सुरू केली. दहिवद फाटा, पातोंडा परिसर तसेच आजूबाजूच्या भागात रात्री उशिरापर्यंत शोध घेण्यात आला. मात्र त्यांचा कोणताही ठावठिकाणा लागला नाही. मंगळवारी सकाळी पुन्हा शोध सुरू असताना नांद्री गावाजवळील बसस्थानक परिसरात काही नागरिकांनी दहिवद फाटा ते नांद्री रस्त्यादरम्यान एका व्यक्तीचा दुचाकीसह रस्त्यालगतच्या खोल खड्यात पडल्याची माहिती दिली. त्यानुसार नातेवाईक आणि ग्रामस्थांनी घटनास्थळी धाव घेतली. रस्त्याच्या उत्तरेकडील बाजूस असलेल्या खड्यात चेतन महाजन हे दुचाकीसह पडलेले आढळून आले. त्यांच्या तोंडाला तसेच हात, पायांना गंभीर इजा झालेली होती. तर, दुचाकीच्या समोरील भागाचे मोठे नुकसान झाल्याचे दिसून आले. त्यानंतर तातडीने खासगी रुग्णवाहिका बोलावून त्यांना अमळनेरच्या ग्रामीण रुग्णालयात दाखल करण्यात आले. परंतु, वैद्यकीय अधिकाऱ्यांनी तपासणी करुन त्यांना मृत घोषित केले. तर, अपघात नेमका कशामुळे झाला, वाहन घसरले की अन्य कोणते कारण होते, याबाबत अद्याप माहिती मिळालेली नाही. या प्रकरणी अमळनेर पोलीस ठाण्यात अकस्मात मृत्यूची नोंद करण्यात आली आहे. तपास अमळनेर पोलीस करत आहेत. मयत चेतन महाजन यांच्या पश्चात पत्नी कोमल, दीड वर्षांचा मुलगा शिव आणि दिव्यांग आई असा परिवार आहे.
