जळगाव (प्रतिनिधी) आमदार संजय सावकारे (Sanjay Saavkare) यांची कार परिवहन मंत्री अनिल परब (Transport Minister Anil Parab) यांच्या नावावर परस्पर ट्रान्सफर (Transfer) केल्याप्रकरणी सायबर पोलिसांनी आरटीओतील तीन एजंटांना सोमवारी अटक केली होती. अशोक विठ्ठल पाटील (जळगाव), प्रशांत उर्फ पप्पू भोळे व अकील शेख रहेमान शेख (रा. भुसावळ) या तिघांना आज न्यायालयात हजर केले असता त्यांना दोन दिवसांची पोलीस कोठडी सुनावण्यात आली आहे.
दोन दिवसांपूर्वीच कनिष्ठ लेखा परिक्षक जवाहरलाल भानुदास कुलकर्णी, कनिष्ठ लिपिक गणेश देवरे, सुनील उर्फ संदीप पाटील व मनोज पाटील यांना दोषी ठरवून परिवहन आयुक्तांनी निलंबित केले होते. कार ट्रान्सफर करताना ज्या मोबाईल क्रमांकावर ओटीपी गेला होता. तो क्रमांक अशोक पाटील यांचा होता तर पप्पू भोळे याने या मोबाईलचा वापर केला होता. अकील शेख रहेमान शेख याने पैसे ट्रान्स्फर केले होते असे तपासात निष्पन्न झाले आहे.
अशी केली कार ट्रान्सफर
याबाबत उपप्रादेशिक परिवहन अधिकारी श्याम लोही यांनी दिलेल्या फिर्यादीप्रमाणे, अज्ञात इसमाने दि. २१ डिसेंबर २०२१ ते दि. २७ डिसेंबर २०२१ दरम्यान परिवहन विभागाचे www.parivahan.gov.in या पोर्टलद्वारे परिवहन वुड्स मेहरूण विभागाचे डेटाबेसमध्ये अनधिकृतपणे प्रवेश करुन आमदार संजय सावकारे यांचे मालकीचे टोयटा कंपनीचे इनोव्हा वाहन क्रमांक MH19 CZ5130 याचेशी लिंक असलेला मो.क्रं. 9325252211 हा बदलुन तो मो.क्रं.- 7798217776 असा केला व त्यानंतर सदर वाहन हे अनिल दत्तात्रय परब यांचे नावे करण्यासाठी ऑनलाईन अर्ज केला व सदर ऑनलाईन अर्जाचे प्रिंटआऊटवर विक्रेता म्हणुन आमदार संजय सावकारे यांची व खरेदीदार म्हणून अनिल दत्तात्रय परब यांची बनावट सही करुन सदर बनावट कागदपत्रे उप प्रादेशिक परिवहन कार्यालय, जळगाव येथे सादर करून सदर वाहन हे अनिल दत्तात्रय परब यांचे नावे हस्तांतरीत करुन संजय सावकारे व उप प्रादेशिक परिवहन कार्यालयाची फसवणुक केल्याप्रकरणी गुन्हा दाखल करण्यात आला होता.
आरोपींचा असा घेतला शोध
या गुन्हयाचे तपासात जळगाव पोलीस अधीक्षक, अपर पोलीस अधीक्षक परिमंडळ यांच्या मार्गदर्शनाखाली सायबर पो.स्टे. चे पोलीस निरीक्षक लिलाधर कानडे यांनी व अधिनस्त पोलीस अधिकारी व अंमलदार यांनी आवश्यक माहीती संबधीत बँकेशी पत्रव्यवहार करून प्राप्त माहीतीचे बारकाईने विश्लेषण करुन गुन्हयातील आरोपी व त्यांचा ठावठिकाणा निष्पन्न केला. गुन्हयाचे तपासकामी व आरोपीतांचा शोध घेवुन त्यांना ताब्यात घेणेकामी सहा पोलीस निरीक्षक संदिपकुमार बोरसे यांच्यासोबत सफो/ बाळकृष्ण पाटील, पोहेकॉ राजेश चौधरी, पोहेकॉ/ प्रविण वाघ, पोना/ दिलीप चिंचोले, पोना/सचिन सोनवणे, पोना/संदीप नन्नवरे, पोकॉ अरविंद वानखेडे, पोकों/पंकज वराडे यांचे पथक तयार करून त्यांना जळगाव आरटीओ कार्यालय परीसर येथे रवाना करण्यात आले होते.
सापळा रचून तीन एजंटांना अटक
तपास पथकाने मिळालेल्या माहितीच्या आधारे आरोपीतासाठी आरटीओ कार्यालयच्या परीसरात संबधीत पोलीस पथकाने सापळा रचुन आरोपीतांना शिताफिने ताब्यात घेतले. या आरोपींकडून वेगवेगळया कंपनीचे ०३ मोबाईल व गुन्ह्यासंबधीत कागदपत्रे हस्तगत करण्यात आले आहे. या आरोपीना आज न्यायालयात हजर केले असता गुन्हयाचे तपासाचे अनुषंगाने २ दिवसांची पोलीस कस्टडी सुनावण्यात आली आहे.
