जळगाव (प्रतिनिधी) आमदार मंगेश चव्हाण यांनी गृहमंत्र्यांना एक पत्र दिले असून त्या पत्रात भुसावळमधील एका प्रकरणाशी संबंधित गंभीर आरोप करण्यात आल्याचे वृत्त आहे. या पत्रात एका खळबळजनक घटनेचा उल्लेख असल्याचे कळते.
ड्रग्ज माफिया ललित पाटीलचे ‘चाळीसगाव कनेक्शन’ बाबत माजी मंत्री आमदार एकनाथराव खडसे यांनी गंभीर आरोप केले होते. त्यावर आमदार मंगेश चव्हाण यांनी देखील मी खडसे यांना कायमच आव्हान देत असतो. त्यामुळे आताही मी माझा सीडीआर जगजाहीर करतो. खडसेंनीही आपला सीडीआर जाहीर करावा. तसेच मागे समोर आलेले भुसावळमधील ड्रग्स प्रकरणातील गुन्हेगार कोणाशी संबंधित होते?, हे खडसेंनी बघावं. त्यामुळे मीच आता ललिल पाटील जळगाव जिल्ह्यात आला असेल तर तो कुणाला भेटला, कुठं आला? या प्रकरणाची चौकशी करण्यासाठी मुख्यमंत्री आणि गृहमंत्र्यांकडे मागणी करणार असल्याचे सांगत आमदार मंगेश चव्हाण यांनी काही दिवसापूर्वी एकच खळबळ उडवून दिली होती.
दरम्यान, सूत्रांनी दिलेल्या माहिती नुसार आमदार मंगेश चव्हाण यांनी गृहमंत्री देवेंद्र फडणवीस यांना तीन-चार दिवसापूर्वी एक पत्र दिले असून त्यात भुसावळमधील एका तरुणीवरील अत्याचारासह ड्रग्ज माफिया ललित पाटीलचे कनेक्शन बाबत गंभीर आरोप करत चौकशी करण्याची मागणी केली असल्याचे कळतेय. दरम्यान, या पत्रात नेमकं काय म्हटले आहे?, याची आता जिल्ह्यात प्रचंड उत्सुकता लागून आहे.
