पुणे (वृत्तसंस्था) लिव्ह इन रिलेशनशिपमध्ये (Live-in-relationship) राहणाऱ्या प्रेयसीची तरुणाने हत्या केल्याची धक्कादायक पुणे जिल्ह्यातील आकुर्डीमध्ये उघडकीस आली आहे. रितू भालेराव (वय २०) असं हत्या झालेल्या तरुणीचं नाव आहे.
रितू भालेराव ही मूळची औरंगाबाद जिल्ह्यातील रहिवासी असून ती गेल्या पाच – सहा महिन्यापासून आकुर्डी परिसरामध्ये शाम रामू ढेरे या तरुणांसोबत लिव्ह इन रिलेशनशिपमध्ये राहत होती. मात्र, रितूची हत्या झाल्यानंतर श्याम ढेरे हा फरार झाला आहे. रितू पुण्यात एमपीएससी परीक्षेची तयारी करत होती. ती पती -पत्नी असल्याच सांगून श्याम ढेरे यांच्या सोबत विठ्ठल वाडी परिसरातील जय मल्हार निवास या ठिकाणी राहायला होती. अशी माहिती पोलिसांनी दिली आहे. रितूच्या त्या मित्राचा शोध घेण्यासाठी निगडी पोलिसांची तीन पथके वेगवेगळ्या ठिकाणी रवाना करण्यात आली आहे.
याबद्दल, वरिष्ठ पोलीस निरीक्षक गणेश जवादवाड यांनी दिलेल्या माहितीनुसार, त्या घरातून दुर्गंधी येत असल्याची माहिती घरमालकाने रविवारी ता. ६ सकाळी सहाच्या सुमारास निगडी पोलिसांना दिली होती. त्यानुसार पोलीस घटनास्थळी दाखल झाले त्यानंतर, पोलिसांनी आत पाहिले असता त्यांना रितू हिचा मृतदेह कुजलेल्या अवस्थेत आढळून आला. पोलिसांनी अधिक विचारपूस केली असता रितू आणि आणखी एकजण मागील पाच महिन्यापासून पती-पत्नी असल्याचे सांगून आकुर्डीत राहण्यास होते असे सांगण्यात आले आहे.
