पुणे (वृत्तसंस्था) लिव्ह इन रिलेशनशिपमध्ये राहणाऱ्या प्रेयसीचा गळा दाबून खून केला. त्यानंतर प्रेयसीचा मृतदेह रिक्षात तिच्या आईच्या घरासमोर ठेवल्याचा धक्कादायक प्रकार बुधवारी सकाळी काळेवाडी स्मशानभूमीजवळ उघडकीस आला. याप्रकरणी वाकड पोलीस ठाण्यात गुन्हा दाखल करण्यात आला असून आरोपी प्रियकराचा शोध सुरू आहे.
शिवानी सोमनाथ सुपेकर असे खून झालेल्या प्रेयसीचे नाव आहे. विनायक अनिल आवळे असे पसार झालेल्या आरोपी प्रियकराचे नाव आहे. शिवानी हिच्या पतीचे २०१८ मध्ये निधन झाले. शिवानीची आई काळेवाडी स्मशानभूमीजवळ राहते. तर संशयित आरोपी आवळे हा विवाहित असून तो पिंपरीत वास्तव्यास आहे. त्याला २० वर्षांचा एक मुलगा आणि मुलगी आहे. गेल्या दोन वर्षांपासून विनायक आणि शिवानी हे ‘लिव्ह इन रिलेशनशिप’ मध्ये राहत होते. मंगळवारी त्यांच्यामध्ये किरकोळ कारणावरून वाद झाला. त्या वादातून विनायक याने मध्यरात्री बारा ते पहाटे तीन यादरम्यान शिवानीचा गळा आवळून खून केला.
खून केल्यानंतर शिवानीचा मृतदेह रिक्षात ठेवून त्यावर चादर टाकली. त्यानंतर रिक्षा तिच्या आईच्या घरासमोर पार्क केली. बुधवारी सकाळी आठच्या सुमारास हा धक्कादायक प्रकार उघडकीस आला. घटनेची माहिती मिळताच पोलीस उपायुक्त विशाल गायकवाड, सहाय्यक पोलीस आयुक्त राजेंद्र कुराडे, वाकड ठाण्याचे वरिष्ठ पोलीस निरीक्षक निवृत्ती कोल्हाटकर यांनी घटनास्थळी धाव घेतली. पोलिसांनी रिक्षा क्रमांकावरून मालकाचा शोध घेतला. त्याने ती रिक्षा आवळे याला भाड्याने दिल्याचे समोर आले. दरम्यान, घटनेनंतर आरोपी आवळे हा पसार झाला असून त्याचा शोध सुरू असल्याचे वाकड पोलिसांनी सांगितले.
