जळगाव (प्रतिनिधी) महात्मा फुले मागासवर्गीय विकास महामंडळातून व्यवसासाठी बोगस लाभार्थ्यांच्या नावे ७०२ प्रकरणात ६७ बँकांमधून तब्बल ६.५० कोटीचा अपहार केल्याच्या २०१८ मधील गुन्ह्यातील आणखी दोन संशयिताना आर्थिक गुन्हे शाखेने अटक केली आहे. यापूर्वी चार जणांना अटक करण्यात आली आहे.
प्रकाश लक्ष्मीकांत कुळकर्णी (वय ३८, रा. राधाकृष्णनगर) व अमरीष अनिल मोकाशी (रा. सदगुरूनगर) या दोघांना आज (गुरुवार) अटक करण्यात आली. यातील कुलकर्णी हा बँकेचा कंत्राटी कर्मचारी आहे. तर मोकाशी हा दलाल असून त्याच्या खात्यात अपहाराची रक्कम जमा करण्यात आली आहे. दोघांना न्यायालयात हजर केले असता ३० नोव्हेंबर पर्यंत पोलिस कोठडी सुनावण्यात आली. सन २०१६ ते २०१८ दरम्यान घडलेल्या या प्रकरणात २ ऑगस्ट २०१९ रोजी रामानंदनगर पोलिस ठाण्यात गुन्हा दाखल करण्यात आला आहे. महामंडळाच्या जिल्हा व्यवस्थापक वैशाली अनिल जाधव यांनी या प्रकरणात फिर्याद दिली आहे. दरम्यान, अटक केलेल्या कुलकर्णी व मोकाशी यांना गुरुवारी न्यायालयात हजर केले असता ३० नोव्हेंबरपर्यंत पोलिस कोठडी सुनावण्यात आली.
