फत्तेपूर ( प्रतिनिधी ) – येथील पोलीस ठाण्याच्या हद्दीतील तोरनाळे शिवारात बहिणीशी आंतरजातीय प्रेमविवाह केल्याचा राग मनात धरून शालकाने मेहुण्याच्या डोक्यात दगड घालून जीवे ठार मारण्याचा प्रयत्न केला. तर मेहुणा मृत झाला असे समजून झाडाचा पाला त्यांच्या अंगावर टाकून त्यांचीच दुचाकी घेऊन शालक तेथून पसार झाल्याची घटना २७ जुलैला सायंकाळी घडल्याने परिसरात खळबळ उडाली आहे.
याबाबत पोलीस सूत्रांकडून मिळालेल्या माहितीनुसार, फत्तेपूर येथील सुभाषपुरा भागातील रहिवासी प्रशांत सुभाष चौधरी (वय २६) यांनी वडगाव सद्दो येथील अभिषेक संतोष मोरे (वय १९) यांच्या बहिणीशी आंतरजातीय प्रेमविवाह केलेला आहे. दरम्यान, लग्न झाल्यापासून अभिषेकच्या मनात प्रशांत यांच्याविषयी सुडाची भावना होती. तर, तो संधीची वाट पाहत होता. शेवटी २७ जुलैला अभिषेक हा प्रशांत यांना त्यांच्याच दुचाकीवर बसवून तोरनाळे शिवारातील वनखंड क्रं. ४६१मधील जंगल भागात घेऊन गेला. त्या ठिकाणी दोघांमध्ये याच कारणावरुन बाचाबाची झाली. त्यात अभिषेक याने प्रशांत चौधरी यांच्या डोक्यात दगड घालून त्यास जीवेठार मारण्याचा प्रयत्न केला. तर, प्रशांत चौधरी मृत झाले असे समजून त्यांच्या अंगावर झाडाचा पाला टाकून प्रशांत यांची दुचाकी घेऊन अभिषेक तेथून पसार झाला. दरम्यान, याबाबत प्रशांत यांची आई सरला नामदेव चौधरी यांनी दिलेल्या फिर्यादीवरून फत्तेपूर पोलीस ठाण्यात भारतीय न्याय संहिता २०२३चे कलम १०९ (१) प्रमाणे संशयित अभिषेक संतोष मोरे (रा वडगाव सद्दो) याच्याविरुद्ध गुन्हा दाखल करण्याब आला आहे.
संशयिताला सिल्लोड तालुक्यातून घेतले ताब्यात
प्रशांत चौधरी यांची प्रकृती चिंताजनक असल्यान त्यांना जळगाव येथील जिल्हा सामान्य रुग्णालयान उपचारार्थ दाखल करण्यात आले आहे. दरम्यान घटनेचे गांभीर्य लक्षात घेऊन रात्रीच पो.हे.कॉ. प्रवीण चौधरी, पो.हे.कॉ. गनी तडवी, पो.कॉ. मुकेश पाटील चेतन तांगडे यांच्या पथकाने संशयिताचा शोध सुर करून त्याला सिल्लोड तालुक्यातील अन्वी येथून ताब्यात घेतले. घटनास्थळी उपविभागीय पोलीस अधिकारी बापू रोहम यांनी भेट दिली असून त्यांच्या मार्गदर्शनात स.पो.नि. अंकुश जाधव आणि पोलीस कर्मचारी तपास करत आहेत.
