जळगाव (प्रतिनिधी) दुचाकीस्वार दोन चोरट्यांनी एका महिला वकिलाच्या दुचाकीसमोर स्वतःची दुचाकी आडवी लावून ५० हजार रुपयांचे सोन्याचे मंगळसूत्र ओरबाडून नेल्याची घटना मंगळवारी रात्री गणपतीनगरातील मनाली ब्युटी पार्लरजवळ घडली.
अॅड. शिल्पा विश्वेश रावेरकर (४०) या मंगळवारी दुचाकीवरून पेट्रोल भरण्यासाठी जात असताना मागून एका मोटारसायकलवर आलेल्या दोन जणांनी रावेरकर यांच्या गळ्यातील सोन्याची चैन व पदक असलेले मंगळसूत्र तोडून नेले. यामुळे रावेरकर यांच्या गळ्याला दुखापत देखील झाली. यानंतर रावेरकर यांनी आरडाओरड केली. मात्र, चोरटे मोटारसायकल वेगाने पळवून निघून गेले. चोरट्यांनी ५० हजार रुपये किंमतीचे २० ग्रॅम वजनाचे काळे मनी, व सोन्याची चैन व पदक असलेले मंगळसूत्र लांबविले.
यानंतर अॅड. रावेरकर यांनी रामानंदनगर पोलिस स्टेशनमध्ये धाव घेतली. त्यांच्या फिर्यादीवरून अज्ञात चोरट्यांविरुध्द गन्हा दाखल करण्यात आला आहे. घटनेनंतर अॅड. रावेरकर यांना पोलिसांनी काही सराईत चोरट्यांचे फोटो दाखवले. यातील एक चोरटा असण्याची शक्यता रावेरकर यांनी व्यक्त केल्याचे कळते. दरम्यान, अँड. रावेरकर यांच्यासोबत याधीही एकदा गळ्यातून मंगळसूत्र लांबवण्याची घटना घडली आहे.
