मुंबई (वृत्तसंस्था) मुंबईजवळील मीरा रोड परिसरात एका मोकळ्या मैदानात गॅस सिलेंडरने भरलेल्या ट्रकला भीषण आग लागली होती. आग लागल्यानंतर आजूबाजूला दोन सिलेंडरने भरलेल्या गाडया होत्या त्या दोन्ही गाड्यांना आग लागली होती. या आगीत ट्रॅकचा जळून कोळसा झाला आहे.
रात्रीच्या गडद अंधारात मीरा रोड स्फोटाने हादरलं आहे. रात्री २ वाजल्यानंतर राम नगर येथील शांती गार्डन, सेक्टर नंबर ५ येथील एका मोकळ्या मैदानात उभ्या असलेल्या सिलेंडरच्या गाडीत सिलेंडरचे स्फोट झाले आहेत. आजूबाजूला दोन सिलेंडरने भरलेल्या गाडया होत्या त्या दोन्ही गाड्यांना आग लागली होती. आणि त्यातील भरलेल्या सिलेंडरचे रात्री दोन वाजल्यापासून एकामागून एक स्फोट होतं होते. जवळपास १२ स्फोट झालं असल्याचे स्थानिक नागरिक सांगत आहेत. रात्री झोपी गेलेले रहिवाशी या स्फोटाने पूर्णपणे हादरून गेले आहेत. स्फोट एवढा तीव्र होता की, स्फोटामुळे आजूबाजू घरांच्या काचा फुटल्या आहेत. सिलेंडरचा पत्रा तसेच गाडीचा पत्रा हा बाजूच्या सोसायटीच्या आवारात पडला होता. सिलेंडरच्या उडलेल्या तुकड्याने एक नागरीक जखमी झाला आहे. त्याला जवळच्या रुग्णालयात उपचारासाठी दाखल करण्यात आलं आहे. स्फोटानंतर लगेच मीरा भाईंदर अग्निशमन दलाच्या सात अग्निशमन गाड्या, दोन टॅंकर, एक टिटीएल गाडी, तसेच ५४ जवान घटनास्थळी दाखल झाले. आणि तीनच्या दरम्यान त्यांनी परिस्थिती पूर्णपणे नियंत्रणात आणली. अर्धा किमीवरुन अग्निशमन दलाच्या कर्मचारी शीडीवरुन पाण्याचा मारा करत होत्या. उशीरापर्यंत ट्रकमधील लिकेज सिलेंडर शोधण्याच काम सुरु आहे.
सुत्रांकडून मिळालेल्या माहितीनुसार ती जागा आरक्षित असल्याने पूर्णपणे मोकळी होती. तेथे नेहमी भरलेल्या सिलेंडरच्या गाड्या लागत होत्या तसेच आजूबाजूला इतर वाहनं देखील पार्किंग करत असतात. तसेच काही नागरीकांनी येथे अवैध सिलेंडरची रिफिलिंग होत असल्याचाही आरोप केला आहे. विशेष म्हणजे ही जागा वसई विरार- मीरा भाईंदर पोलीस आयुक्तालयाच्या अगदी मागे शंभर मीटर अंतरावर आहे. पोलीस आयुक्तलायाच्या मागे अवैध गोष्टी चालत असल्यानो नागरीकांमध्ये आश्चर्य व्यक्त केलं जात आहे.
एलपीजी सिलेंडर असलेल्या ट्रकला आग लागली की लावली गेली, या दृष्टीने पोलीस तपास करत आहे. आजूबाजूच्या परिसरातील सीसीटीव्ही व्हिडीओ तपासले जात आहे. एलपीजी सिलेंडर असलेल्या या ट्रकला जाणूनबुघून कुणी आग तर लावली नाही ना, अशी शक्यता वर्तवली जात आहे. पोलीस सर्व बाजूने या घटनेचा तपास करत आहे.
