नवी दिल्ली (वृत्तसंस्था) दिल्ली पोलिसांच्या (Delhi Police) सायबर क्राईम युनिटने मध्य प्रदेशातील (Madhy pradesh) इंदूरमधून (Indore) ‘सुल्ली डील्स’ अॅप (SulliDeals) बनवणाऱ्या आरोपीला अटक केली आहे. २५ वर्षीय ओंकारेश्वर ठाकूर (Onkareshwar Thakur) इंदूरच्या न्यूयॉर्क सिटी टाऊनशिपचा रहिवासी आहे. पोलिसांनी त्याला त्याच्या घरातून अटक केली आहे.
ट्विटरवरील एका ट्रेड-ग्रुपचा सदस्य होता आणि मुस्लिम महिलांना बदनाम करण्यासाठी आणि ट्रोल करण्यासाठी विचार शेअर करत असे. त्याने गिटहबवर कोड विकसित केल्याची कबुलीही दिली आहे, अशी माहिती पोलिसांनी केलेल्या प्राथमिक चौकशीत त्याने दिली आहे. गिटहबवर ग्रुपच्या सर्व सदस्यांना अॅक्सेस होता. त्याने हे अॅप त्याच्या ट्विटर अकाउंटवरही शेअर केले आहे. ग्रुपमधील सदस्यांनी मुस्लिम महिलांचे फोटोही अपलोड केल्याचे त्याने सांगितले.
ओंकारेश्वरने जानेवारी २०२० मध्ये @gangescion या ट्विटर हँडलवरून ट्विटरवर एका ग्रुपमध्ये सामील झाला होता. या ग्रुपचे नाव ट्रेडमहासभा असे होते. या ग्रुपमध्ये मुस्लिम महिलांना ट्रोल करण्यासाठी चर्चा केली जात होती, अशी माहिती पोलीस सूत्रांनी दिली. यानंतर त्याने गिटहबवर सुल्ली डील्स अॅप तयार केले. पण सुल्ली डील्सचे प्रकरण उघड झाल्यानंतर त्याने सर्व सोशल मीडियावरील फूटप्रिंट हटवले. त्याच्याकडे सापडलेल्या गॅजेट्सचा पोलीस तपास करत आहेत.
