भुसावळ (प्रतिनिधी) – शहरातील उदासी कॉम्प्लेक्स परिसरात असलेल्या मोबाईल दुरुस्तीच्या दुकानात अज्ञात चोरट्यांनी कुलूप तोडून चोरी केल्याची घटना उघडकीस आली आहे. या प्रकरणी भुसावळ बाजारपेठ पोलीस ठाण्यात गुन्हा दाखल करण्यात आला असून पुढील तपास सुरू आहे.
याबाबत पोलिसांनी दिलेल्या माहितीनुसार, गणेश प्रदीप विसे (वय ३६, रा. शिवधाम मंदिराजवळ, जळगाव) यांनी पोलीस ठाण्यात दिलेल्या फिर्यादीनुसार, त्यांचे उदासी कॉम्प्लेक्स येथे बेंडे हॉटेलजवळ ‘रुद्रा मोबाईल रिपेअरिंग’ नावाचे दुकान आहे. या दुकानावर त्यांचा कुटुंबाचा उदरनिर्वाह चालतो. दि. १८ ऑगस्ट २०२६ रोजी सायंकाळी सुमारे ५.३० वाजता त्यांनी नेहमीप्रमाणे दुकान बंद करून कुलूप लावून घरी गेले होते. त्यानंतर दुसऱ्या दिवशी दि. १९ ऑगस्ट रोजी सकाळी सुमारे ११ वाजता दुकान उघडण्यासाठी आल्यावर दुकानाचे कुलूप तोडलेले आढळून आले. शटर उघडून आत गेल्यावर दुकानातील साहित्य अस्ताव्यस्त पडलेले दिसले. त्यानंतर त्यांनी लॉकरमध्ये ठेवलेले रोख पैसे व ग्राहकांचे मोबाईल तपासले असता ते चोरीस गेले असल्याचे निदर्शनास आले. यानंतर त्यांनी शेजारील दुकानदार राजेंद्र पाटील व मनोज कोटेचा यांच्याकडे चौकशी केली, मात्र त्यांना कोणतीही माहिती नसल्याचे समजले. तसेच बसस्थानक व रेल्वे स्थानक परिसरात शोध घेतला असता कोणताही सुगावा लागला नाही. या चोरीमध्ये अंदाजे १९ हजार रुपयांचा मुद्देमाल लंपास करण्यात आला असून त्यात ३ हजार रुपये रोख रक्कम तसेच विवो, एमआय टेन ५जी व रिअलमी टेन प्रो या कंपन्यांचे प्रत्येकी सुमारे ५ ते ६ हजार रुपये किमतीचे मोबाईल समाविष्ट आहेत.
दि. १८ ऑगस्ट सायंकाळी ५.३० ते दि. १९ ऑगस्ट सकाळी ११ या कालावधीत अज्ञात चोरट्याने दुकानात अनधिकृत प्रवेश करून ही चोरी केल्याचे स्पष्ट झाले आहे. या प्रकरणी भुसावळ बाजारपेठ पोलीस ठाण्यात गुन्हा दाखल करण्यात आला असून पुढील तपास पोलीस हेडकॉन्स्टेबल भूषण चौधरी करीत आहेत.
