जळगाव (प्रतिनिधी) नाशिकच्या आधी मुंबई हावडा एक्सप्रेसला बॉम्बने उडवून देऊ, अशी धमकी ट्विटवररुन रेल्वे विभागाला मिळाली. या धमकीनंतर रेल्वे सुरक्षा बल व बॉम्बशोधक पथकाकडून जळगाव रेल्वे स्थानकावर मुंबई हावडा एक्सप्रेसची तपासणी करण्यात आली. मात्र रेल्वेमध्ये काहीही न सापडल्याने सुमारे अडीच तासानंतर ट्रेन पुढील प्रवासासाठी रवाना करण्यात आली आहे.
हावडा रेल्वे स्थानकावरुन मुंबईकडे येणाऱ्या १२८०९ या हावडा-मुंबई मेलमध्ये टायमर बॉम्ब ठेवला आहे. नाशिक स्थानक येण्याच्या आधी या गाडीत मोठा बॉम्बस्फोट होईल, असा मेसेज रेल्वे विभागाला ट्विटरवरुन मिळाला होता. यानंतर रेल्वे प्रशासनात खळबळ उडाली होती. मुंबई हावडा मेलमध्ये बॉम्ब ठेवल्याची माहिती मिळताच प्रवाशांमध्ये भीतीचे वातावरण निर्माण झाले होते. ट्विटरवरून आलेल्या धमकीच्या मेसेजनंतर जळगाव रेल्वे सुरक्षा बल आणि बॉम्बशोधक पथकाकडून जळगाव रेल्वे स्थानकावर मुंबई हावडा रेल्वे गाडी थांबवण्यात आली. हावडा-मुंबई मेलमध्ये १२८०९ ट्रेनमध्ये टायमर बॉम्ब ठेवण्यात आल्याची माहिती मिळताच रेल्वे प्रशासन, पोलीस आणि अग्निशमन दलाने तातडीने जळगाव रेल्वे स्थानकावर धाव घेतली. यानंतर या गाडीची पूर्णपणे तपासणी करण्यात आली.
पहाटे ४ वाजून १७ मिनिटांनी जळगाव रेल्वे स्थानकावर ही गाडी थांबवली. रेल्वे सुरक्षा बल आणि बॉम्बशोधक पथकाकडून गाडीतील प्रत्येक डब्ळ्यात जाऊन ही तपासणी करण्यात आली. तब्बल अडीच तास या गाडीची संपूर्ण तपासणी करण्यात आली. या तपासणीनंतर ६ वाजून २८ मिनिटांनी ही एक्सप्रेस पुढच्या प्रवासासाठी मार्गस्थ करण्यात आली. या माहितीला रेल्वे सुरक्षा बलाने विभागाकडून दुजोरा देण्यात आला आहे.
एकीकडे मुंबई हावडा एक्सप्रेस तर दुसरीकडे मुंबईहून न्यूयॉर्कला निघालेल्या एअर इंडियाच्या विमानाला बॉम्बने उडवून देण्याची धमकी देण्यात आली होती. या दोन्ही घटनांमुळे प्रशासनाकडून सर्तकतेचा इशारा देखील देण्यात आला होता. फजलुद्दीन निर्बन या नावाच्या ट्विटर अकाउंटवरून रेल्वे प्रशासनाला धमकीचा मेसेज मिळाला आहे. हिंदुस्तानी लोकांनी आजची सकाळ तुमच्यासाठी रक्तरंजित असणार आहे. आज एका फ्लाईटमध्ये आणि एका ट्रेनमध्ये बॉम्ब ठेवण्यात आला आहे. नाशिक येण्यापूर्वी खूप मोठा बॉम्बस्फोट होईल, असे एका व्यक्तीने ट्वीट केले होते.
