पुणे (वृत्तसंस्था) येथील पाषाण भागातील नॅशनल केमिकल लॅबोरेटरी (एनसीएल) येथे पीएचडी करत असलेल्या विद्यार्थ्याचा धारदार शस्त्राने गळ्यावर वार करून खून करण्यात आल्याची धक्कादायक घटना समोर आली आहे. खून केल्यानंतर पुरावा नष्ट करण्यासाठी या विद्यार्थ्याचा चेहरा दगडाने ठेचून मृतदेह सुस येथील खिंडीत टाकून देण्यात आला होता. याप्रकरणी चतु:श्रुंगी पोलीस ठाण्यात खूनाचा गुन्हा दाखल करण्यात आला आहे.
सुदर्शन उर्फ बाल्या बाबुराव पंडीत (वय ३०) असे खून झालेल्या तरुणाचे नाव आहे. सुदर्शन उर्फ बाल्या बाबुराव पंडित या तरुणाची हत्या करण्यात आली. सुदर्शन हा पुण्यातील पाषाण भागातील नॅशनल केमिकल लॅबोरेटरी येथे पीएचडी करत होता. सुतारवाडी भागातील शिवनगर परिसरात सुदर्शन पंडित राहत होता. तो मूळ जालना जिल्ह्यातील जाफराबाद तालुक्यातील जानेफळचा (पंडित) रहिवासी होता.धारदार शस्त्राने गळ्यावर वार करुन सुदर्शनची हत्या करण्यात आल्याची धक्कादायक घटना काल समोर आली. खून केल्यानंतर पुरावा नष्ट करण्यासाठी त्याचा चेहरा दगडाने ठेचण्यात आला. त्याचा मृतदेह सुस येथील खिंडीत टाकून देण्यात आला. सुदर्शनच्या हत्येबाबत त्याचा चुलत भाऊ संदीप पंडित यांनी फिर्याद दिली. या प्रकरणी पुण्यातील चतु:श्रुंगी पोलीस स्टेशनला गुन्हा दाखल करण्यात आला असून पोलीस अधिक तपास करत आहेत.
दरम्यान, विद्यार्थ्याच्या हत्येने पाषाण भागात एकच खळबळ उडाली आहे. ही हत्या नेमकी कुणी केली व कोणत्या उद्देशाने केली याचा शोध पोलीस घेत आहेत. अद्याप या प्रकरणी कुणालाही अटक करण्यात आलेली नाही.
