जळगाव (प्रतिनिधी) गावात नेहमी भांडण करतो म्हणून वडीलकीच्या नात्याने वडीलांसह लहान भावाने मोठ्या मुलाच्या चापटा मारल्या. त्याचा राग मनात धरुन बसलेल्या मोठ्या मुलाने निलेश आनंदा पाटील (रा. नांद्रा. ता. जामनेर) याने वडीलांचे तोंड दाबून चाकूने वार केले. याचवेळी वडीलांना वाचविण्यासाठी आलेल्या लहान भावाला देखील चाकूने भोसकून दुहेरी खून केल्याची घटना जामनेर तालुक्यातील नांद्रा गावात घडली होती. याप्रकरणी न्यायालयाने मारेकरी निलेश पाटील याला दोषी ठरवित त्याला आजन्म कारावासाची शिक्षा सुनावली.
हातातील चाकूने भोसकून केला खून !
जामनेर तालुक्यातील नांद्रा गावात आनंदा कडू पाटील हे वास्तव्यास होते. त्यांचा मोठा मुलगा निलेश हा ट्रॅव्हल्सवर चालक होता तर लहान मुलगा महेंद्र हा चटई कंपनीत कामाला होता. दि. ११ जुलै २०२० रोजी महेंद्र हा पत्नीसह आपल्या गावी मुक्कामी गेला होता. त्याच दिवशी रात्रीच्या सुमारास त्याचा मोठा भाऊ निलेश याने घराजवळ राहणाऱ्या पांडुरंग सोनवणे यांच्यासोबत वाद घातला. यावेळी लहान भाऊ महेंद्र याने मोठ्या भाऊ निलेश याला समजावून घरी आणले. त्यानंतर वडीलकीच्या नात्याने निलेश याला गावात नेहमी भांडण करतो म्हणत वडीलांसह लहान भावाने दोन-चार चापटा मारल्या त्यानंतर सर्वजण झोपून गेले होते. दरम्यान, आनंदा पाटील हे पत्नीसह घराच्या बाहेर ओसरीवर खाट टाकून झोपलेले असतांना निलेश याने त्याच्या वडीलांचे तोंड दाबून हातातील चाकूने भोसकून खून केला. हे बघून त्याच्या आईने ओरडून भैय्या पळ असा आवाज दिला. तो आवाज ऐकून महेंद्र हा पत्नीसह खोली बाहेर आला असता, त्याच्या भावाने वडीलांचे तोंड दाबले होते आणि त्यांच्या तोंडातून रक्त निघत असल्याचे दिसले.
रक्ताने माखलेला चाकून घेवून गेला पोलीस पाटलाच्या घरी
वडीलांसह लहान भावाचा खून केल्यानंतर मारेकरी निलेश हा हातात रक्ताने माखलेला चाकू घेवून पोलीस पाटील यांच्याघरी गेला. त्याने मी माझ्या बापाचा आणि भावाचा खून केला असून तुम्ही घराकडे चला असे त्याने सांगितले. यावेळी पोलस पाटील यांनी घटनेची खात्री केली. दरम्यान, मारेकरी निलेश हा गावातील लोकांना माझ्याजवळ येवू नका तुम्हाला मारुन टाकीन अशी धमकी देखील देत होता.
अन् मोठ्या भावाच्या हातून झाला लहान भावाचा खून !
मारेकरी निलेश पाटील हा ट्रॅव्हल्सवर चालक म्हणून कामाला होता, कोरोना काळात लॉकडाऊनमुळे याची त्याची नोकरी सुटली होती. तर त्याचा लहान भाऊ याला देखील सुट्टी असल्याने तो पत्नीसह गावी गेला होता. घटनेच्या दिवशी हा गावी गेलेला असल्याने दुर्देवाने मोठया भावाकडून रागाच्या भरात लहान भावाचा खून झाला होता.
आईने केली घटना कथन !
प्रत्यक्षसाक्षीदार असलेल्या सरस्वतीबाई यांनी घडलेली घटना जशीच्या तशी न्यायालयासमोर सांगितली. एकीकडे पतीः आणि लहान मुलाचा खून झालेला होता, तर दुसरीकडे मोठा मुलगा हा आरोपीच्या पिंजऱ्यात उभा होता, अशी द्विधा मनस्थिती असतांना सरस्वतीबाई यांनी साक्ष दिली. त्यांच्यासह पोलीस पाटील योगेश बेलदार, दिनेश कुऱ्हाडे, अरुण शिंदे, मयताची पत्नी अश्विनी पाटील, प्रकाश पाटील, वैद्यकीय अधिकाऱ्यांसह तपासधिकारी सहा. पोलीस निरीक्षक राकेश परदेशी यांच्या साक्ष महत्वपुर्ण ठरल्या.
वडिलांना वाचवण्यासाठी गेलेल्या भावाला भोसकले !
वडीलांना वाचविण्यासाठी महेंद्र हा गेला असता, मारेकरी निलेश याने त्याच्या हातातील चाकू लहान भावाच्या पोटात खूपसून त्याचा देखील खून केला. यावेळी तो वहीनीच्या देखील अंगावर धावून गेला. मात्र त्यांनी पळत जावून घराचा दरवाजा बंद केल्याने त्या बालंबाल बचावल्या होत्या. यापकरणी महेंद्र याची पत्नीने दिलेल्या फिर्यादीवरुन पहुर पोलीसात दुहेरी खूनाचा गुन्हा दाखल झाला होता
पुराव्यांसह प्रभावी युक्तीवादामुळे ठरवले दोषी !
हा खटला प्रमुख जिल्हा व सत्र न्यायाधीश एम. क्यू. एस. एम. शेख यांच्या न्यायालयात चालला. यावेळी एकूण १३ साक्षीदार तपासण्यात आले. यामध्ये घटनास्थळावरील पुराव्यांसह प्रभावी युक्तीवाद ग्राह्य धरीत मारेकरी निलेश पाटील याला न्यायालयाने दोषी ठरवत जन्मठेप व पाच हजार रुपये दंडाची शिक्षा सुनावली. यामध्ये सरकार पक्षातर्फे जिल्हा सरकारी वकील अॅड. सुरेंद्र काबरा यांनी तर पैरवी अधिकारी म्हणून राजेंद्र सैंदाणे यांनी काम काज पाहिले.