जळगाव / भुसावळ (प्रतिनिधी) – रेल्वेचे लोखंड चोरी करतांना हटकल्याच्या कारणावरुन संतोष रघुवीर मंचाल (वय ५५) या पुजाऱ्याचा खून केल्याची घटना झेड.टी. एस. परिसरातील रेल्वे ट्रॅकजवळ घडली होती. घटनास्थळी कुठलाही पुरावा नसतांना पोलिसांनी हळदीच्या कार्यक्रमात मारहाण करतांनाच्या व्हिडीओवरुन खूनाचा उलगडा करीत खून करणाऱ्या हर्षल राजू वर्मा उर्फ बॉक्सर (वय १९), क्षितीज संजय भालेराव (वय १९) आणि प्रफुल्ल उत्तम जाधव (वय २१, सर्व रा. भुसावळ) यांना जेरबंद केले.
शहरातील झेड.टी.एस. परिसरातील रेल्वे ट्रॅकजवळ असलेल्या कालीका माता मंदिरातील पुजारी संतोष रघुवीर मनचल (वय ५५) यांची दि. २८ जून रोजी मध्यरात्रीच्या सुमारास मारहाण करीत हत्या केल्याची घटना घडली होती. या घटनेचे गांभीर्य लक्षात घेऊन जिल्हा पोलीस अधीक्षक श्रीकांत धिवरे, अपर पोलीस अधीक्षक संदीप गावीत आणि उपविभागीय पोलीस अधिकारी केदार बारबोले यांनी घटनास्थळी भेट देत तपासाच्या सूचना दिल्या. त्यानुसार स्थानिक गुन्हे शाखा आणि भुसावळ पोलिसांनी रेल्वे भंगार चोरी करणारे, नशेखोर तसेच भंगार व्यावसायिकांची कसून चौकशी केली जात होती. दरम्यान, घटनेच्या रात्री काही तरुणांनी रेल्वेचे लोखंड चोरी करून जाम मोहल्ला परिसरातील एका भंगार विक्रेत्याला विकल्याचे समोर आले आहे. संशयितांनी भंगार चोरी केल्यानंतर पुन्हा भंगार घेण्यासाठी मंदिर परिसरात गेले. त्याठिकाणी पुजारी संतोष मनचल यांनी त्यांना हटकले. त्यातून झालेल्या वादात आरोपींनी संतापाच्या भरात त्यांच्या चेहऱ्यावर व छातीवर लाथाबुक्क्यांनी बेदम मारहाण करीत त्यांचा खून केला.
पोलीसी खाक्या दाखविताच दिली कबुली
सुरुवातीला संशयित हे पोलिसांना वेगवेगळ्या कारणे देवून गुंगारा देत होते. मात्र पोलिसी खाक्या दाखविताच त्यांनी संतोष मंचाल यांच्या हत्येची कबुली देत लोखंड चोरी करतांना झालेल्या वादातून त्यांची हत्या केल्याचे पोलिसांना सांगितले. तसेच तिघ संशयित हे इयत्ता बारावीच्या वर्गात शिक्षण घेत असल्याचे पोलिसांच्या तपासात उघड झाले आहे.
या पथकाची कामगिरी
ही उल्लेखनीय कामगिरी जिल्हा पोलीस अधीक्षक श्रीकांत धिवरे, अपर पोलीस अधीक्षक संदीप गावीत आणि उपविभागीय पोलीस अधिकारी केदार बारबोले यांच्या मार्गदर्शनाखाली स्थानिक गुन्हे शाखेचे पोलीस निरीक्षक राहुल गायकवाड, महेश गायकवाड, राहुल वाघ तसेच स्थानिक गुन्हे शाखा, भुसावळ शहर पोलीस ठाणे व बाजारपेठ पोलीस ठाण्याच्या गुन्हे शोध पथकाने केली.
शवविच्छेदन अहवालानंतर मिळाली तपासाला दिशा
घटनास्थळी कुठलाही तांत्रिक व भौतिक पुरावा किंवा प्रत्यक्ष साक्षीदार नसतांना पोलिसांकडून गोपनिय माहितीच्या आधारावर संशयितांचा शोध घेतला जात होता. दरम्यान, शवविच्छेदन अहवालात मयताच्या जबड्यावर आणि बरगड्यांवर मारल्यामुळे मृत्यू झाल्याचे स्पष्ट झाले. तोच तपासाचा धागा पोलिसांना गवसला आणि त्यांनी मारेकरी हा बॉडी बिल्डर किंवा बॉक्सर असल्याचा संशय बळावला आणि त्यादृष्टीने पोलिसांकडून संशयितांचा शोध घेतला जात होता.
