मुंबई (वृत्तसंस्था) मुंबई उच्च न्यायालयाने ताशेरे ओढल्यानंतर, राष्ट्रवादीचे नेते आणि महाराष्ट्राचे मंत्री नवाब मलिक यांनी एनसीबीचे झोनल डायरेक्टर समीर वानखेडे यांच्यावर केलेल्या वक्तव्याबद्दल बिनशर्त माफी मागितली आहे. कोर्टाच्या आदेशाचा अवमान करण्याचा कोणताही हेतू नव्हता. बिनशर्त माफी मागतो आणि यापुढे अशी विधाने करणार नाही, अशी हमी त्यांनी कोर्टात प्रतिज्ञापत्राद्वारे दिली.
समीर वानखेडे यांचे वडिल ज्ञानदेव वानखेडे यांच्या मानहानी दाव्यातील अर्जावर एकल न्यायमूर्ती पीठासमोर सुनावणी पूर्ण होऊन निकाल येईपर्यंत वानखेडे कुटुंबियांविरोधात कोणतीही विधाने करणार नाही, अशी लेखी हमी हायकोर्टात दिल्यानंतरही मलिक यांनी प्रसारमाध्यमांना दिलेल्या मुलाखतीत आक्षेपार्ह विधाने केली, असा आक्षेप नोंदवणारा अर्ज ज्ञानदेव वानखेडे यांनी केला होता. त्यावरील सुनावणीनंतर न्यायमूर्ती शाहरुख काथावाला व न्यायमूर्ती मिलिंद जाधव यांच्या खंडपीठाने मलिक यांना जाब विचारत कोर्टाच्या आदेशाचा अवमान केल्याबद्दल तुमच्याविरुद्ध नोटीस का काढू नये, याबद्दल प्रतिज्ञापत्रावर उत्तर दाखल करण्याचे निर्देश दिले होते. त्याप्रमाणे मलिक यांनी आज चार पानी प्रतिज्ञापत्र दाखल करून कोर्टाची बिनशर्त माफी मागितली आणि यापुढे वानखेडे यांच्याविषयी कोणतीही विधाने करणार नसल्याची हमी दिली.
‘मी फक्त माझ्या सरकारी सेवकपदाच्या अधिकारात वक्तव्ये केली. मी वानखेडे यांच्याविषयी कोणतीही व्यक्तिगत विधाने केली नाहीत,’ असे मलिक यांनी सांगितले. ‘यापूर्वी व्यक्त केलेल्या वक्तव्यांविषयी खेद व्यक्त करतो. कोर्टाच्या आदेशाचा अवमान करण्याचा कोणताही हेतू नव्हता. बिनशर्त माफी मागतो आणि यापुढे विधाने करणार नाही, अशी हमी देतो, अशी हमी मलिक यांच्याकडून हायकोर्टात देण्यात आली.
‘ज्ञानदेव वानखेडे यांनी त्यांच्या अर्जात माझी तीन विधाने दाखवली असली तरी, ती मी प्रासारमाध्यमांना दिलेल्या मुलाखतीमधील आहेत. पत्रकारांनी विविध व व्यापक विषयांवर विचारलेल्या प्रश्नांच्या उत्तरात माहिती देताना मी तशी विधाने केली होती, असे नमूद केले. त्यामुळे मी हायकोर्टात दिलेल्या हमीचे उल्लंघन होत नसल्याचा माझा समज होता. मात्र, वानखेडे यांच्याविषयीच्या कोणत्याही विधानाने कोर्टातील हमीचे उल्लंघन होते, असे मला आता समाजवण्यात आले आहे. त्यामुळे यापुढे त्यांच्याविषयी कोणतेही विधान मी करणार नाही. मात्र, केंद्रीय तपास यंत्रणांचा राजकीय हेतूने होणारा वापर आणि त्या यंत्रणांच्या अधिकाऱ्यांकडून पदाचा होणारा दुरुपयोग याविरोधात बोलण्यास मला प्रतिबंध असल्याचा अर्थ माझ्या या हमीचा घेतला जाऊ नये’, असे मलिक यांनी आपल्या प्रतिज्ञापत्रात नमूद केले.
