धरणगाव (प्रतिनिधी) राष्ट्रवादी काँग्रेसचे अध्यक्ष शरद पवार यांच्या मुंबईतल्या सिल्व्हर ओक निवासस्थानाबाहेर संपकरी एसटी कर्मचाऱ्यांनी अचानक आंदोलन केलं. यावेळी संपकऱ्यांसोबत सिल्वर ओक येथे ॲड.गुणरत्न सदावर्ते यांनी केलेल्या चिथावणीखोर भाषणाने आक्रमक झालेल्या एस.टी. कर्मचाऱ्यांनी सिल्व्हर ओकच्या आवारात घुसून शरद पवार यांच्या निवासस्थानावर दगडफेक आणि चप्पलफेक केली. या घटनेच्या निषेधार्थ धरणगाव येथे राष्ट्रवादी काँगेस पक्षाच्या वतीने छत्रपती शिवाजी महाराजांच्या स्मारका जवळ ॲड. गुणरत्न सदावर्तेच्या प्रतिमा पोस्टरला जोडेमार आंदोलन करुन निषेध व्यक्त केला.
यावेळी सामाजिक न्याय विभागाचे जळगाव जिल्हाध्यक्ष अरविंद मानकरी यांच्या नेतृत्वात धरणगाव पोलिस ठाण्याचे सपोनी गणेश अहिरे यांना दिलेल्या निवेदनात म्हटले आहे की, आमच्या राष्ट्रवादी काँगेस पक्षाचे संस्थापक, अध्यक्ष शरद पवार यांच्या घरावर झालेल्या हल्ल्याचा निषेध करतो, व यामागील कटकारस्थान रचणाऱ्या गुणरत्ने सदावर्तेला रासुका अंतर्गत अटक करण्यात यावी. त्याचप्रमाणे, पुरोगामी महाराष्ट्रात अशी घटना आजपावेतो झालेली नाही. अश्याप्रकरे दगडफेक होणे हे अत्यंत निंदनीय निंदनीय कृत्य असून याच्या तीव्र शब्दात निषेध करतो त्याचप्रमाणे पोलिसांनी ह्या दगडफेक करणाऱ्या लोकांना ताब्यात घेऊन त्यांच्यावर कडक कारवाई करावी अन्यथा आम्ही रस्त्यावर उतरलो, तर अश्या प्रवृत्तीला धडा शिकवू असा इशारा सामाजिक न्याय विभाग जिल्हाध्यक्ष अरविंद मानकरी यांनी दिला आहे. यापुढे महाराष्ट्र असे हल्ले कदापी सहन करणार नाही. असेही यावेळी मानकरी म्हणाले.
