मुंबई (वृत्तसंस्था) महाराष्ट्रात लोकसभा निवडणुकीच्या मतदानादरम्यान ईव्हीएममध्ये कुठल्याही प्रकारची छेडछाड झालेली नाही. राज्यात मतदान प्रक्रिया सुरळीत व शांततेत पार पडली, असा खुलासा राज्याच्या मुख्य निवडणूक अधिकारी कार्यालयाने शनिवारी केला.
विरोधकांनी केलेल्या आरोपांत तथ्य नसल्याचे आयोगाने म्हटले आहे. राज्यात नुकत्याच लोकसभा निवडणुकीच्या मतदानाचे पाच टप्पे पार पडले. मात्र, मतदानादरम्यान मतदान प्रक्रियेला बाधा आणणारे आणि ईव्हीएममध्ये छेडछाडीचा प्रयत्न करणारे व्हिडीओ समाजमाध्यमांमध्ये व्हायरल झाले होते. त्यावरून विरोधकांनी निवडणूक आयोगावर टीकेची झोड उठवत पारदर्शक प्रक्रियेवर शंका उपस्थित केली होती.
मात्र, या व्हिडीओची पडताळणी केली असता मतदान प्रक्रिया बाधित होणारे आणि ईव्हीएममध्ये छेडछाडीचा प्रयत्न होत असल्याचे दाखविले जाणारे व्हिडीओ जुने असून, ते इतर राज्यांतील आहेत. या व्हिडीओंचा नुकत्याच पार पडलेल्या महाराष्ट्रातील निवडणुकीशी काहीही संबंध नाही, असा दावा करतानाच राज्यातील मतदान प्रक्रिया ही संपूर्णपणे शांततेत आणि सुरळीत झालेली आहे, असे मुख्य निवडणूक अधिकारी कार्यालयाने स्पष्ट केले आहे.
