जळगाव (प्रतिनिधी) विद्यापीठाच्या शिक्षकेतर कर्मचाऱ्यांना सातव्या वेतन आयोग सर्व लाभासह लागू झाला पाहिजे, यासह विविध मागण्यांसाठी उच्च व तंत्र शिक्षणमंत्री उदय सामंत यांना शिक्षकेतर कर्मचारी आणि अधिकारी संघटनेतर्फे निवेदन देण्यात आले. दरम्यान, कर्मचारी संघटना २१ सप्टेंबरपासून लेखणी बंद आंदोलनासह ठिय्या आंदोलन करणार आहे.
महाराष्ट्र राज्याचे उच्च व तंत्रशिक्षण मंत्री ना. उदय सामंत हे आज जळगाव जिल्ह्याच्या दौर्यावर आहेत. विद्यापीठात आढावा बैठक घेतली. यावेळी विद्यापीठातील शिक्षकेतर कर्मचारी आणि अधिकारी संघटनेने निवेदन दिले. शासनाच्या वित्त विभागाच्या दोन निर्णयातील सेवांतर्गत आश्वासित प्रगती योजनेच्या तरतुदी लागू केल्याचे उच्च व तंत्र शिक्षण विभागाचे रद्द केलेले शासन निर्णय पूर्वलक्षी पूर्वप्रभावाने पुनर्जीवित करावेत. आकृषी विद्यापीठाच्या शिक्षकेतर कर्मचाऱ्यांना सातव्या वेतन आयोग सर्व लाभासह लागू झाला पाहिजे. या दोन मागण्यांची पूर्तता होत नसल्याने त्याच्या निषेधार्थ आंदोलन करण्यात येणार आहे. त्यासाठी २१ सप्टेंबर पासून लेखणी बंदसह ठिय्या आंदोलन करणार असल्याचे म्हटले आहे. दरम्यान, यावेळी उदय सामंत यांनी शिक्षकेतर कर्मचाऱ्यांना मागण्या पूर्ण करण्याचे आश्वासन दिले.
