धुळे (प्रतिनिधी) सोशल मिडीयावर पालकमंत्री गिरीष महाजन यांच्याबद्दल अक्षेपार्ह पोस्ट करुन त्यांची बदनामी केल्याप्रकरणी डॉ. संजय पिंगळे यांच्याविरुध्द शहर पोलीस ठाण्यात गुन्हा दाखल करण्यात आला आहे. या घटनेचे पडसाद म्हणून अज्ञात व्यक्तींनी डॉ. पिंगळे यांच्या कारची तोडफोड केली.
भाजपचे पदाधिकारी प्रविण महाविर अग्रवाल (रा. भाईजी नगर, चक्करबर्डी रोड) यांनी शहर पोलिसात दिलेल्या फिर्यादीत म्हटले आहे की, ते दि. ६ रोजी दुपारी फेसबुक पाहत असतांना ओळखीतील संजय पिंगळे (रा. ग्राहक भांडार समोर, गांधी पुतळयाजवळ, धुळे) यांनी त्यांच्या फेसबुक अकाऊंटवर धुळे जिल्ह्याचे पालकमंत्री गिरीष महाजन यांची बदनामी करणारी पोस्ट प्रसारीत केल्याचे दिसून आले. त्यावरुन संजय पिंगळे यांच्याविरुध्द भादंवि कलम ५००, ५०४ अन्वये गुन्हा दाखल केला.
तर दुसरीकडे मंत्री महाजन यांच्याबद्दल आक्षेपार्ह पोस्ट टाकल्याच्या कारणावरुन काल सायंकाळी ७.३० वाजेच्या सुमारास डॉ. संजय पिंगळे यांच्या गांधी पुतळ्याजवळील पाटबाजारालगत असलेल्या घराजवळ अनोळखी ७ व्यक्ती आले. त्यांनी शिवीगाळ, दमदाटी केली. तसेच लाठ्या-काठ्या व लोखंडी रॉडने कार (एमएच १८ / बीएक्स- १७२८) ची तोडफोड केली. त्यानंतर अंधाराचा फायदा घेवून संशयित पसार झाले. याप्रकरणी डॉ. संजय पिंगळे यांच्या पत्नी निता पिंगळे यांनी आझादनगर पोलीस ठाण्यात दिलेल्या फिर्यादीवरुन अनोळखी ७ जणांविरुध्द विविध कलमान्वये गुन्हा दाखल करण्यात आला आहे.
