धरणगाव (प्रतिनिधी) धरणगाव ग्रामीण रुग्णालयात आज चार रुग्णांचा मृत्यू झाल्यामुळे प्रचंड खळबळ उडाली आहे. दरम्यान, या रुग्णांचा मृत्यू ऑक्सिजन अभावी झाल्याचे कळतेय. तर दुसरीकडे रुग्णालयात आणखी काही रुग्णांची प्रकृती गंभीर असल्याचीही माहिती समोर आली आहे.
आज धरणगाव ग्रामीण रुग्णालयात ऑक्सिजन अभावी चार रुग्णांचा मृत्यू झाल्याचे बोलले जात आहे. रुग्णालयात अवघे दहा ऑक्सिजन बेड असून उपचार घेणाऱ्या रुग्णांची संख्या 30 ते 35 आहे. यामुळे आज उपचार घेत असताना ऑक्सिजन अभावी चार रुग्णांचा मृत्यू झाल्याची माहिती सूत्रांनी दिली. त्यात एक रुग्ण खर्दे येथील तर तीन धरणगाव शहरातील रुग्णांचा समावेश आहे. मयत रुग्णांचे वय 55 ते 65 दरम्यान आहे.
धरणगाव तालुक्यात कोरोनाचे रुग्ण वाढतच आहे. तशातच विविध आजारांची साथ देखील सुरू आहे. ग्रामीण रुग्णालयात शहरासह तालुक्यातील रुग्ण उपचार घेण्यासाठी आहे. परंतू औषध साठा शिल्लक नसल्याने औषधी रुग्णांना मिळत नाहीत. दरम्यान, रुग्णांना रुग्णालयात पिण्याचे पाणीदेखील मिळत नसल्याची तक्रारी समोर येत आहे. कोरोनाचे पेशंट धरणगाव तालुक्यात वाढतांना दिसून येत आहेत. मात्र ग्रामीण रुग्णालयात काहीही नियोजन दिसून येत नाही. याकडे प्रशासनाने लक्ष द्यावे असे आवाहन धरणगाव तालुक्यातील रहिवासी करीत आहे.
ग्रामीण रुग्णालयात 10 बेड ऑक्सिजनचे आहेत. मात्र पेशंट 30 ते 35 उपचार घेत आहेत. ज्या रुग्णांना अत्यावश्यक आहे, त्या रुग्णांना आम्ही ऑक्सिजन पुरवण्याचे काम करत आहोत. तरी मात्र ऑक्सिजन बेड या ठिकाणी कमी पडत आहेत. ज्यांचे मृत्यू झाले त्यांची प्रकृती आले तेव्हापासूनच चिंताजनक होती.
गिरीश चौधरी
वैद्यकीय अधिकारी (धरणगाव)
रुग्णालयात ऑक्सीजन बेडची संख्या वाढविण्यासंदर्भात जिल्हा शल्य चिकित्सक यांच्यासोबत फोनवर बोलणे झाले असून लवकरच ऑक्सिजन बेडची संख्या वाढणार आहे. दुसरीकडे रुग्णांची वाढती संख्या लक्षात घेता शहरासह तालुक्यातील डॉक्टरांनी ग्रामीण रुग्णालयात शक्य असेल तेवढा वेळ सेवा देण्याचा प्रयत्न करावा, त्या बदल्यात मी व्यक्तिगत मोबदला देखील देण्यास तयार आहे.
निलेश चौधरी,
(नगराध्यक्ष धरणगाव)
धरणगाव ग्रामीण रुग्णालयाची दयनीयस्थिती असून भारतीय जनता पार्टी धरणगाव शहराच्यावतीने जिल्हा प्रशासनाला अनेक वेळा निवेदन दिली आहेत. परंतु प्रशासनाने हलगर्जीपणा करत त्याकडे दुर्लक्ष केले. पालकमंत्री गुलाबराव पाटील यांनी लक्ष घातले असते या ठिकाणी कर्मचाऱ्यांची कमतरता राहिली नसती. सर्व सोयीसुविधा उपलब्ध राहिल्या असत्या. जिल्हा प्रशासनाने व पालकमंत्री यांनी लवकरात लवकर सोयी सुविधा उपलब्ध करून द्याव्यात, अन्यथा धरणगाव तालुक्यातील जनता यांना माफ करणार नाही व भविष्यात यांना यांची जागा दाखवल्या शिवाय राहणार नाही.
कैलास माळी नगरसेवक
भाजपा गटनेते धरणगाव
