नवी दिल्ली (वृत्तसंस्था) जगभरात ओमायक्रॉन (Omicron)चे संकट गडद होत असताना भारतामध्येही ओमायक्रॉनच्या रुग्णांमध्ये वाढ होताना दिसत आहे. दरम्यान, आता कानपूर (Kanpur)मधील इंडियन इन्स्टिट्यूट ऑफ टेक्नॉलॉजी संशोधकांनी (Researcher) कोरोनाच्या तिसऱ्या लाटेसंदर्भात भाकित व्यक्त केलं आहे. संशोधकांच्या म्हणण्यानुसार ओमायक्रॉन विषाणूचा प्रादुर्भावामुळे देशात लवकरच कोरोनाची तिसरी लाट येणार आहे.
कानपूरमधील इंडियन इन्स्टिट्यूट ऑफ टेक्नॉलॉजी म्हणजेच आयआयटी कानपूरच्या संशोधकांनी कोरोनाच्या तिसऱ्या लाटेसंदर्भात अभ्यास केलाय. आयआयटी कानपूरच्या संशोधकांनुसार ओमायक्रॉन विषाणूचा प्रादुर्भावामुळे देशात लवकरच कोरोना संसर्गाची तिसरी लाट येणार आहे. ३ फेब्रुवारीपर्यंत कोरोनाच्या या तिसऱ्या लाटेमध्ये रुग्णसंख्येचा उच्चांक गाठला जाईल असंही संशोधकांनी म्हटलं.
कानपूर आयआयटीमधील या संशोधकांनी भारतामधील कोरोना संसर्गाच्या तिसऱ्या लाटेसंदर्भात हा निष्कर्ष गॉजियन मिक्सर मॉडल या स्टॅटिस्टीकल टूलच्या माध्यमातून काढलाय. ऑनलाइन प्रीप्रिंट सर्व्हर मेडीरेक्व्हीने प्रकाशित केलेल्या या अहवालामध्ये जगभरातील करोना संसर्गाच्या ट्रेण्डचा अभ्यास करण्यात आलाय. या अभ्यासाच्या आधारे भारतामध्ये कोरोनाची तिसरी लाट डिसेंबरच्या मध्यपासून सुरु होईल असं दिसत असल्याचं संशोधकांनी म्हटलंय. कोरोनाची ही तिसरी लाट फेब्रुवारीच्या सुरुवातीच्या आठवड्यामध्ये सर्वाधिक उंच्चाकावर (म्हणजेच पीकवर) असेल असंही अहवालात म्हटलंय.
कोणती माहिती वापरली?
संशोधकांनी भारतामधील कोरोनाच्या पहिल्या आणि दुसऱ्या लाटेदरम्यानची आकडेवारी आणि सध्या वेगवेगळ्या देशांमध्ये असणाऱ्या ओमायक्रॉनच्या रुग्णसंख्येच्या आधारे माहिती गोळा करुन निष्कर्ष काढला आहे. याच माहितीच्या आधारे तिसरी लाट कधी येईल यासंदर्भातील अंदाज व्यक्त करण्यात आलाय. यापूर्वीही आयआयटीच्या संशोधकांनी फेब्रुवारी महिन्यात कोरोनाची तिसरी लाट येईल असा अंदाज व्यक्त केलेला आहे.
