चाळीसगाव (प्रतिनिधी) शहरातील घाटरोड परिसरात नगरपालिका शॉपिंग कॉम्प्लेक्स जवळ सापळा रचून गावठी कट्यासह एका तरुणास चाळीसगाव शहर पोलिसांनी अटक केली आहे. चांद सलीम सैय्यद (२३, रा.नागद रोड झोपडपट्टी, चाळीसगाव) असे आरोपीचे नाव आहे. दरम्यान, त्याचा साथीदार मात्र, फरार होण्यात यशस्वी झालाय.
चाळीसगाव शहर पोलीस स्टेशन घाट रोड पोलीस चौकीचे पोलीस नाईक भगवान उमाळे, पंकज पाटील, पो.कॉ. निलेश पाटील, अमोल पाटील यांना गोपनीय माहिती मिळाली होती की, घाटरोड परिसरात न.प. कॉम्प्लेक्स जवळील चहाच्या टपरीजवळ एक तरुण गावठी कट्यासह उभा आहे. त्यावरून त्यांनी सदर माहिती वरिष्ठांना दिली. त्यानंतर पोलीस निरीक्षक विजय कुमार ठाकुरवाड, स.पो.नि. एन.ए.सैय्यद यांच्या मार्गदर्शनाखाली पोलीस नाईक भगवान उमाळे, पंकज पाटील, पो कॉ निलेश पाटील, अमोल पाटील यांनी दि. १८ रोजी रात्री १०:२० वाजता आरोपी चांद सलीम सैय्यद (२३, रा.नागद रोड झोपडपट्टी, चाळीसगाव) यास ३० हजाराचा गावठी कट्टा, मॅगझीन, ३ जिवंत काडतूस तसेच ३२ हजार ६०० रुपयाच्या रोकडसह अटक केली. त्याचा साथीदार मात्र फरार झाला असून त्याचा शोध पोलीस घेत आहेत. चाळीसगाव शहर पोलीस स्टेशनला आरोपी विरोधात गुन्हा दाखल करण्यात आला असून पुढील तपास स.पो.नि. एन.ए. सैय्यद हे करीत आहेत.
