जळगाव (प्रतिनिधी) भरधाव कंटेनरने दुचाकीला समोरून जोरदार धडक दिली. यात एका जणाचा जागीच मृत्यू झाला तर त्याच्या सोबत असलेला अन्य एक जण गंभीर जखमी झाला. ही घटना शहरातून जाणाऱ्या महामार्गावर घडली आहे. तसेच शहरातून जाणाऱ्या महामार्गाच्या चौपदरीकरणाचे काम सुरू असताना अपघातांचा मालिका सुरूच आहे.
याबाबत वृत्त असे की, नाशिक जिल्ह्यातील गुजर खेडा (ता. येवला) येथील रहिवासी असलेले धवल अंबादास बच्छाव आणि समाधान श्रीराम चंदन हे दोन्ही कामानिमित्त आज दुचाकीने जळगाव कडून भुसावळ कडे जात होते. शहरातील महामार्गावरील अजिंठा चौफुली च्या अलीकडे असलेल्या रिलायन्स पेट्रोल पंपाच्या पुढे गेले असताना समोरून भरधाव वेगाने येणाऱ्या कंटेनरने त्यांना जोरदार धडक दिली. यात समाधान चंदन हा जागीच ठार झाला. तर धवल अंबादास बच्छाव हा गंभीर जखमी झाला आहे. जखमीला तातडीने रुग्णालयात उपचारासाठी दाखल करण्यात आले आहे.
