अमळनेर (प्रतिनिधी) क्रेडिट कार्डला १ हजार ८९९ रुपयांचा दंड लागला असून तो रद्द करण्याच्या नावाखाली अमळनेर येथील एकाची ऑनलाईन फसवणूक झाल्याची घटना उघडकीस आली आहे. याप्रकरणी अमळनेर पोलीस स्थानकात अज्ञात व्यक्तीविरुद्ध गुन्हा दाखल करण्यात आला आहे.
यासंदर्भात अतुल ज्ञानेश्वर ब्राम्हणकर (वय ४६, रा. रतन दादा गेट नगर जवळ संभाजी नगर, अमळनेर) यांनी दिलेल्या फिर्यादीनुसार, दि. १० मे २०२२ रोजी ब्राम्हणकर यांच्या मोबाईलवर अज्ञात व्यक्तीने फोन केला. तसेच त्या अज्ञात व्यक्तीने सांगितले की, तुमच्या ऍक्सीस बँक क्रेडीट कार्डला १,८९९ रूपयांचा दंड लागला आहे. तो दंड तुम्हाला रद्द करावयाचे असल्यास मी तुम्हाला एक लिंक पाठवितो. त्या लिकंवर तुम्ही माहिती भरून पाठवा. त्यात तुम्हाला एक ओटीपी येईल तो ओटीपी मला सांगा, असे सांगून मोबाईल नंबरवर https://cardprotectionlogin.in/axiscard ही लिंक पाठविली.
त्यानंतर सदर प्रक्रिया सुरु असतांना ब्राम्हणकर यांच्या मोबाईलवर अधूनमधून ओटीपीचे एसएमएस येत होते आणि समोरून बोलणाऱ्या इसमास ते सदरचे ओटीपी सांगत होतो. त्यानंतर थोड्याच वेळात ब्राम्हणकर यांच्या एक्सीस बँकेच्या खात्यातून प्रथम ३० हजार रुपये, नंतर १० हजार रुपये आणि त्यानंतर १० हजार रुपये असे एकुण ५० हजार रुपये खात्यातून काढण्यात आल्याचे लक्षात आले. याप्रकरणी अमळनेर पोलीस स्थानकात अज्ञात व्यक्तीविरुद्ध गुन्हा दाखल करण्यात आला असून पुढील तपास पोलीस निरीक्षक जयपाल हिरे हे करीत आहेत.
