धरणगाव (प्रतिनिधी) येथील सामाजिक कार्यकर्ते व छत्रपती क्रांती सेनेचे जळगांव जिल्हाध्यक्ष लक्ष्मण पाटील यांचा लग्नाचा व मुलाच्या वाढदिवसाच्या निमित्ताने “सहवास – अ केअर” संस्थेतील अपंग व मतिमंद मुलांना स्नेहभोजन दिले. त्यांच्या सोबत केक कापून आणि जेवण करून मित्रपरिवार व कुटुंबियांसोबत आनंददायी व संस्मरणीय कार्यक्रम संपन्न झाला.
याबाबत सविस्तर वृत्त असे की, एरंडोल – कासोदा मार्गावर वनकोठे गावापासून थोड्या अंतरावर सहवास बहुउद्देशीय संस्था कार्यरत आहे. यामध्ये “सहवास – अ केअर” च्या अंतर्गत २१ अपंग व मतिमंद मुलांचा सांभाळ संस्थेचे संस्थापक अध्यक्ष समाधान सावंत व त्यांचे संपूर्ण सावंत कुटूंब (रा. सोनबर्डी) करीत आहेत. ‘वेद वाचता येतात, वेदना वाचता आल्या पाहिजेत कारण ज्याला वेदना वाचता येतात तोच संवेदना ठेऊन काम करू शकतो” याचा प्रत्यय सावंत कुटुंबियांना भेटून याची देही, याची डोळा।। या उक्तीप्रमाणे जाणवतो. लक्ष्मण पाटील यांनी जेव्हा त्यांचे मित्र व मार्गदर्शकांसोबत या संस्थेबाबत चर्चा केली तेव्हा सर्वांनी सकारात्मक प्रतिसाद दिला. १० डिसेंबरला लग्न आणि मुलाच्या वाढदिवसाचे औचित्य साधून या संस्थेतील मुलांना स्नेहभोजन देऊन कार्यक्रम करावा याबाबत नियोजन करण्यात आले. सहवास संस्थेत गेल्यानंतर जो अनुभव आला तो शब्दांत वर्णन करण्याचा पलीकडे असाच होता. त्या सर्व मुलांच्या चेहऱ्यावर उमललेल्या हास्याच्या पुढे सर्व धनसंपत्ती फिकी पडावी असा अविस्मरणीय अनुभव यानिमित्ताने आला.
कार्यक्रमाच्या सुरवातीला ज्या कुटुंबियांच्या समर्पित वृत्तीने संस्थेचे कार्य मागील ५ वर्षांपासून अविरत आणि अखंडपणे सुरु आहे, अशा सावंत कुटुंबियांचा शाल, महापुरुषांचे चरित्र ग्रंथ व गुलाब पुष्प देऊन सन्मान करून त्यांच्या कार्यप्रति आदरभाव व्यक्त करण्यात आला. यामध्ये संस्थापक अध्यक्ष समाधान सावंत, त्यांचे वडील हिलाल सावंत, आई रंजना सावंत, पत्नी मनिषा सावंत, मोठे बंधू विश्वनाथ सावंत, वहिनी आरती सावंत आणि सहकारी धनंजय भोसले या सर्वांचा सन्मान करण्यात आला. त्यांनतर विवेक याचे औक्षण करण्यात आले. केक कापून संस्थेतील अपंग व मतिमंद मुलांसोबत आनंदोत्सव साजरा करण्यात आला. मुलांना केक, चॉकलेट, कोल्ड्रिंक्स आणि स्नेहभोजन देण्यात आले. त्यांच्यासोबत आयोजक व संयोजकांनी देखील दोन घास खाल्लेत. त्या मुलांच्या चेहऱ्यावर असलेलं हास्य आणि तृप्तीचे समाधान स्पष्टपणे जाणवत होते.
या अतिशय देखण्या कार्यक्रम प्रसंगी “सहवास – अ केअर” संस्थेचा कार्यभार सांभाळणारे सावंत कुटुंबिय, छत्रपती क्रांती सेनेचे जिल्हाध्यक्ष लक्ष्मण पाटील व त्यांचे कुटुंबिय, AVB माझा चे तालुका प्रतिनिधी आबासाहेब राजेंद्र वाघ व त्यांच्या पत्नी ललिता राजेंद्र वाघ, महात्मा फुले हायस्कूलचे उपक्रमशील शिक्षक पी. डी. पाटील व हेमंत माळी, प्रताप महाविद्यालयाचे प्रा. रविंद्र मराठे, श्री क्लिनिकल लॅबोरेटरी चे संचालक नरेंद्र पाटील, माझा महाराष्ट्र न्यूज चे प्रतिनिधी निलेश पवार, साई इंटरप्राइजेसचे विक्रम पाटील, सामाजिक कार्यकर्ते अशोक महाजन यांच्यासह ‘सहवास संस्थेतील’ सर्व निरागस व निष्पाप मुले उपस्थित होते. या छोटेखानी कार्यक्रमाचे सूत्रसंचालन पी. डी. पाटील तर आभार प्रदर्शन समाधान सावंत यांनी केले.
