जळगाव (प्रतिनिधी) शिंदे गटाचा मेळावा हा हिंदुत्त्वाच्या विचारांचा आहे, परंतु उद्धव ठाकरेंचा दसरा मेळावा हा शरद पवार आणि सोनिया गांधी यांच्या मिक्स विचारांचा असल्याची टीका राज्याचे पाणीपुरवठा मंत्री आणि शिंदेगटाचे नेते गुलाबराव पाटील यांनी केली आहे. ते जळगावात आयोजित पत्रकार परिषदेत बोलत होते.
यावेळी ना. गुलाबराव पाटील म्हणाले की, आमचा मेळावा बघायला बाळासाहेबांचा आत्मा येईल, गेली अडीच वर्ष आम्ही हिंदुत्त्वाच्या विचारापासून दूर गेलो होतो. परंतु आता हिंदुत्त्वाच्या रक्षणासाठी आम्ही परत भगवा झेंडा हाती घेतला आहे. दरम्यान आता दसरा मेळाव्यासाठी शिवसेनेला अजून कुठलंही मैदान मिळालेलं नाही. दादरमधील शिवाजी पार्कावर दसरा मेळाव्याची परवानगी मिळावी म्हणून शिवसेना आणि शिंदे गटानं अर्ज दाखल केले होते. परंतु त्यावर अजून बीएमसीनं कुठलाही निर्णय घेतलेला नाही. याशिवाय बीकेसीच्या मैदानावर दसरा मेळाव्याची परवानगी मिळावी, यासाठी दोन्ही गटांनी अर्ज केला होता. त्यानंतर एमएमआरडीएनं शिवसेनेचा अर्ज नाकारत शिंदे गटाला मेळाव्यासाठी परवानगी दिली होती. त्यानंतर आता मंत्री गुलाबराव पाटलांनी थेट ठाकरेंवर टीका केल्यानं दोन्ही गटातील संघर्ष वाढण्याची चिन्हं आहेत.
