नवी दिल्ली (वृत्तसंस्था) भारताचा माजी क्रिकेटपटू आणि भाजपा आमदार गौतम गंभीरला जीवे मारण्याची धमकी देण्यात आली होती. गंभीरनेच यासंदर्भातील तक्रार पोलिसांकडे केली होती. दरम्यान, पोलीसांनी केलेल्या तपासात मोठा खुलासा झाला आहे. गौतम गंभीरला धमकीचा मेल पाकिस्तानातून आल्याची माहिती समोर आली आहे.
माजी क्रिकेटर आणि भारतीय जनता पक्षाचे खासदार गौतम गंभीर यांना मिळालेल्या धमकीच्या मेलची पाळंमुळं पाकिस्तानात असल्याचा धक्कादायक खुलासा पोलीस तपासणीतून समोर आलाय. या मेलमध्ये गौतम गंभीर आणि त्यांच्या कुटुंबांना जीवे मारण्याची धमकी देण्यात आली होती. हा धमकीचा मेल पाकिस्तानातून धाडला गेल्याचा खुलासा झालाय. दिल्ली पोलिसांनी ‘गूगल’कडे या मेलसंबंधी माहिती मागितली होती. गूगलनं दिलेल्या माहितीनुसार, गौतम गंभीर यांना मिळालेला धमकीचा ई मेल पाकिस्तानातून धाडण्यात आला आहे. हा मेल ज्या सिस्टममधून धाडण्यात आला त्याचा आयपी अॅड्रेस पाकिस्तानात आढळला आहे.
भाजपचे पूर्व दिल्ली लोकसभा मतदारसंघाचे खासदार गौतम गंभीर यांना मंगळवारी एक धमकीचा मेल मिळाला होता. ‘इसिस काश्मीर’कडून गंभीर आणि त्यांच्या कुटुंबीयांना ठार मारण्याची धमकी या ई-मेलद्वारे देण्यात आली होती. हा मेल मिळाल्यानंतर गौतम गंभीर यांनी तातडीनं बुधवारी रात्री मध्य दिल्ली पोलीस उपायुक्त श्वेता चौहान यांची भेट घेऊन आपली तक्रार नोंदविली होती. त्यानंतर पोलिसांकडून या प्रकरणाचा तपास सुरू करण्यात आला होता. सोबतच, पोलिसांनी गंभीर यांच्या घराबाहेर सुरक्षेत वाढ केली आहे.
