जळगाव (प्रतिनिधी) प्रतीक्षा यादीवरील वाहन चालक यांना परिपूर्ण प्रशिक्षण दिल्याशिवाय प्रवासी एसटी चालविण्यासाठी न देणेबाबत मनसे जिल्हाध्यक्ष अँड. जमील देशपांडे यांनी जळगाव एसटी महामंडळ विभाग नियंत्रकांना निवेदन दिलेय. तसेच दुर्घटना घडल्यास एसटी प्रशासन व सरकार जबाबदार राहील असा इशारा देखील देशपांडे यांनी दिला आहे.
एसटी महामंडळ प्रतीक्षा यादीवरील ५० वाहन चालक यांना रविवार पासून नियुक्ती पत्र देऊन प्रवासी एसटी चे स्टेरिंग त्यांच्या हातात देणार असल्याचे आज वर्तमानपत्राच्या माध्यमातून कळाले. याबाबत अधिक माहिती घेतली असता प्रतीक्षा यादीवरील वाहन चालक यांची निवड ६ महिन्यापूर्वी झाली आहे. त्यांचे प्रशिक्षण सुद्धा ६ महिन्यापूर्वी झाले असल्याचे कळते. एस टी च्या नियमानुसार नियमित वाहन चालक सुध्दा १० ते १५ दिवस सुटीवर असल्यास त्यांना पुन्हा प्रशिक्षण घेऊन मग कामावर हजर केले जाते. अशा परिस्थितीत ६ महिन्यापूर्वी प्रशिक्षण झालेल्या उमेदवारांना पुन्हा १० दिवसाचे प्रशिक्षण देण्यात यावे मगच त्यांना एसटीचे स्टेरिंग हातात द्यावे, अशी मागणी या निवेदनाद्वारे करण्यात आली आहे.
तसेच जिल्हा शल्य चिकित्सक यांच्याकडून शारीरिक व मानसिक स्थिती योग्य असल्याचे प्रमाणात व जिल्हा पोलीस अधीक्षक यांच्याकडील चारित्र्य पडताळणी प्रमाणात सुद्धा घेण्यात यावे. एसटी कर्मचाऱ्यांचा संप मोडण्यासाठी प्रतिक्षा यादीवरील वाहन चालक यांची तातडीचीनियुक्ती गंभीर दुर्घटनेला कारण ठरू नये, अशी भीती मनसे जिल्हाध्यक्ष अँड. जमील देशपांडे यांनी व्यक्त केली आहे.
