जळगाव (प्रतिनिधी) – मद्याच्या नशेत सार्वजनिक ठिकाणी भांडण करीत असतांना गावठी पिस्तुल काढून दहशत माजविल्याची घटना दि. १७ रोजी रात्री १० वाजता वाघ नगर परिसरातील सिद्धीविनायक चौकात घडली. संशयितांकडून गावठी पिस्तुलसह तीन जीवंत काडतूस हस्तगत करण्यात आले. याप्रकरणी दोघांविरुद्ध नागरिकांची सुरक्षितता धोक्यात आणल्याप्रकरणी गुन्हा दाखल करण्यात आला आहे. तसेच आर्म अॅक्ट व महाराष्ट्र दारुबंदी कायद्यानुसारदेखील कारवाई करण्यात आली आहे.
शहरातील वाघ नगर परिसरातील सिद्धीविनायक चौकात दि. १७ मे रोजी रात्री प्रवीण महादू महाले (वय ४६, रा. पिंप्राळा), खगेश मिलिंद चौधरी (वय २३, रा. आसोदा, ता. जळगाव) या दोघं मद्यपी तरुणांनी परिसरात वाद घातला होता. त्यानंतर संशयितांनी त्यांच्या जवळ असलेले गावठी पिस्तुल नागरिकांवर रोखून फायरिंग करण्याचा प्रयत्न केला. यावेळी संतप्त झालेल्या नागरिकांनी त्यांना बेदम चोप दिला.
फायर झाल्याबाबत पोलिसांना शंका
रविवारी रात्रीच्या सुमारास कोल्हे हिल्स परिसरात गोळीबार झाल्याची माहिती मिळाल्यानंतर उपविभागीय पोलीस अधिकारी नितीन गणापुरे हे घटनास्थळी दाखल झाले. पोलिसांना घटनास्थळाहून एक जीवंत काडतूस मिळून आले आल्यामुळे फायर झाला की नाही, याबाबत पोलिसांना अद्याप देखील शंका आहे. दरम्यान, परिसरातील नागरिकांमध्ये गोळीबार झाल्याची चर्चा दबक्या आवाजात सुरु आहे.
