जळगाव (प्रतिनिधी) – अधिक परताव्याचे अमिष दाखवून २७९ जणांची २३ कोटीत रुपयात फसवणुक करणाऱ्या एजंटने जळगावातील बँकेत कंपनीच्या खात्यातील असलेली रक्कम, संचालकांसह त्याच्या पत्नीच्या नावावर ट्रान्सफर केल्याचे पोलिसांच्या तपासात उघड झाले आहे. याप्रकरण अटकेत असलेल्या टीडब्ल्यूजे असोसिएटसच्या जळगाव शाखेचा मुख्य एजंट मिलिंद शालिकराव पाटील (वय ४१, रा. शिवकॉलनी) याला तीन दिवसांची वाढीव पोलिस कोठडी सुनावण्यात आली आहे.
पुणे येथील टीडब्ल्यूजे असोसिएटस या कंपनीकडून २७९ जणांची २३ कोटी ८१ लाख ७२ हजार ५३० रुपयांमध्ये फसवणूक केल्याप्रकरणी जिल्हापेठ पोलिस ठाण्यात गुन्हा दाखल करण्यात आला आहे. हा गुन्हा आर्थिक गुन्हे शाखेकडे वर्ग करण्यात आला. या प्रकरणी जळगावातील मुख्य एजंट मिलिंद पाटील याला अटक केल्यानंतर तीन दिवसांची पोलिस कोठडी सुनावण्यात आली होती. दि. १८ मे रोजी कोठडीची मुदत संपल्याने त्याला न्यायालयात हजर केले. तपासात अजून बरेच कागदपत्रे हस्तगत करणे व अन्य कारणांसाठी तपासाधिकाऱ्यांनी वाढीव कोठडीची मागणी केली असता तीन दिवसांची वाढीव कोठडी सुनावण्यात आली आहे.
चार लॅपटॉपमध्ये कंपनीचा डेटा
मिलिंद पाटील याच्याकडून पोलिसांनी लॅपटॉप जप्त केला आहे. त्या लॅपटॉपमध्ये त्याने टीडब्ल्यूजे असोसिएटस प्रा.लि. कंपनीच्या फ्रेंचायसीच्या अनुषंगाने वेळोवेळी केलेले पत्रव्यवहार मिळून आले. तसेच या लॅपटॉपमध्ये अजून खूप डाटा असल्याचे तपासधिकाऱ्यांनी न्यायालयासमोर सांगीतले.
बँकेच्या खात्यावर स्विकारली रक्कम
कंपनीचे जळगावात कार्यालय सुरू झाल्यानंतर एजंट मिलिंद पाटील याने जळगावातील एका एका बँकेत कंपनीचे खाते उघडले होते. त्याच खात्यात त्याने जिल्ह्यातील गुंतवणूकदारांच्या रकमा स्वीकारल्या. ते पैसे एजंटने कंपनीच्या संचालकांच्या खात्यावर तसेच वेळोवेळी मोठ्या रकमा त्याच्या पत्नीच्या बँक खात्यावर ट्रान्सफरेल्याचे पोलिसांच्या तपासात उघड झाले आहे.
चार गोण्या कागदपत्रे केले हस्तगत
एजंट मिलिंद पाटील याच्या पोलिस कोठडीदरम्यान तपास करताना त्याच्याकडून आर्थिक गुन्हे शाखेच्या पथकाने वेगवेगळ्या फाईल व इतर कागदपत्रे असे एकूण ४ गोण्या कागदपत्रे जप्त केली आहेत. कंपनीच्या संचालकांनी मिलींद पाटील याला कार्यालयीन कामकाजासाठी अजून ४ लॅपटॉप दिले असल्याचे तपासात निष्पन्न झाले आहे. ते लॅपटॉप जप्त करणे बाकी असल्याचेही तपासाधिकाऱ्यांनी न्यायालयासमोर सांगितले.
