जळगाव (प्रतिनिधी) जिल्ह्यातील कासोदा पोलिसांनी एका मोठ्या जुगार अड्ड्यावर छापा टाकून सात जुगारींना अटक केली आहे. या कारवाईत पोलिसांनी १ लाख ६६ हजार रुपयांचा मुद्देमाल जप्त केला आहे. कासोदा गावाजवळच्या बांभोरी शिवारात ही कारवाई गुरूवारी ११ सप्टेंबर रोजी दुपारी साडेचार वाजण्याच्या सुमारास करण्यात आली. या कारवाईमुळे खळबळ उडाली आहे.
कासोदा पोलीस स्टेशनचे सहायक पोलीस निरीक्षक निलेश राजपूत यांना बांभोरी शिवारात, गालापूर रोडवरील फैजल शेख यांच्या शेतात काही जण जुगार खेळत असल्याची गोपनीय माहिती मिळाली. या माहितीच्या आधारे त्यांनी तात्काळ पोलीस नाईक अखिल मुजावर, पोलीस कॉन्स्टेबल समाधान तोंडे, प्रशांत पगारे, कुणाल देवरे आणि योगेश पाटील यांचे पथक तयार करून कारवाईसाठी रवाना केले. पोलिसांनी सापळा रचून गालापूर रोडजवळच्या नाल्याकाठी काही इसम जमिनीवर घोळका करून पत्त्यांचा जुगार खेळत असल्याचे पाहिले. त्यानंतर, पोलिसांनी अचानक छापा टाकत जुगारींना रंगेहाथ पकडले.
मोठा मुद्देमाल जप्त, सात आरोपींना अटक
पोलिसांनी केलेल्या या कारवाईत एकूण सात आरोपींना अटक करण्यात आली. यात शेख फारुख शेख नबी (वय ५०), शेख शहीद शेख रफिक (वय ४०), शेख निजाम शेख सिराज (वय ५२), तस्लीम सुलेमान खान (वय ५७), शेख हमीद शेख शौकत (वय ४३), शेख हमीद शेख अमीर (वय ४०) आणि शेख मुस्ताक खान अमीर खान (वय ६०) यांचा समावेश आहे. हे सर्व आरोपी कासोदा, ता. एरंडोल येथील रहिवासी आहेत. त्यांच्याकडून ३ हजार ३८० रुपये रोख, २२ हजार रुपयांचे मोबाईल फोन आणि १ लाख ४० हजार रूपयांच्या तीन मोटरसायकली असा एकूण १ लाख ६६ हजार ३० रुपयांचा मुद्देमाल जप्त करण्यात आला. पोलीस कॉन्स्टेबल समाधान तोंडे यांच्या तक्रारीवरून कासोदा पोलीसात गुन्हा दाखल करण्यात आला आहे.
