धरणगाव (प्रतिनिधी) धरणगावच्या राजकारणात आज मोठी घडामोड घडली आहे. माजी नगरसेवक वासू चौधरींसह अनेक कार्यकर्त्यांनी शिंदे गटात प्रवेश केला आहे. पाणीपुरवठा व स्वच्छता मंत्री तथा जळगाव जिल्ह्याचे पालकमंत्री ना. गुलाबराव पाटील यांच्या उपस्थितीत पाळधी येथील विश्रामगृह येथे हा प्रवेश सोहळा पार पडला.
पाणीपुरवठा व स्वच्छता मंत्री तथा जळगाव जिल्ह्याचे पालकमंत्री ना. गुलाबराव पाटील यांच्या उपस्थितीत पाळधी येथील विश्रामगृह येथे धरणगाव शहरातील माजी नगरसेवक वासुदेव चौधरी यांच्यासह अनेक कार्यकर्त्यांनी आज शिंदे गटात प्रवेश केला आहे. यामुळे धरणगाव शहरात शिवसेनेला मोठा धक्का बसला आहे. वासू चौधरी यांनी पुन्हा एकदा ना. गुलाबराव पाटील यांच्यासोबत जाण्याचा निर्णय घेतल्यामुळे धरणगावचे राजकारण ढवळून निघाले आहे. वासू चौधरी हे माजी नगराध्यक्ष सुरेशनाना चौधरी यांचे निकटवर्तीय मानले जातात. तसेच ते पहिल्या दिवसापासून शिवसेनेसोबत होते. परंतू वासू चौधरी यांनी पुन्हा एकदा गुलाबराव पाटील यांच्यासोबत जाण्याचा निर्णय घेतल्यामुळे शिवसेनेला गावात मोठा धक्का बसला आहे. विशेषतह: माजी नगराध्यक्ष सुरेशनाना चौधरी यांच्या गटाला मोठेच खिंडार पडले आहे. दुसरीकडे राष्ट्रवादीला देखील चांगलाच धक्का बसला आहे. कारण माजी नगरसेवक राजू शेख यांनी देखील आज शिंदे गटात प्रवेश केलाय.
दरम्यान, दसरा मेळाव्याच्या पार्श्वभूमीवर पाणीपुरवठा व स्वच्छता मंत्री तथा जिल्ह्याचे पालकमंत्री ना. गुलाबराव पाटील यांच्या उपस्थितीत धरणगाव तालुक्यातील पाळधी येथे शिंदे गटाची बैठक घेण्यात आली. यावेळी जळगाव जिल्ह्यातील किमान १० हजार शिवसेनेचे कार्यकर्ते दसरा मेळाव्याला जाणार असल्याची प्राथमिक माहिती पालकमंत्री गुलाबराव पाटील यांनी दिली.
