जळगाव (प्रतिनिधी) राज्याचे वनमंत्री संजय राठोड यांनी राजीनामा दिल्याची मला आताच माहिती मिळाली. मुख्यमंत्र्यांनी संजय राठोड यांच्या चौकशीचे आदेश दिले असून चौकशीत दोषी आढळल्यास त्यांच्यावर गुन्हा दाखल होईलच तूर्त राठोडांच्या राजीनाम्याबद्दल बोलणे योग्य ठरणार नाही. असे शिवसेनेचे नेते आणि राज्याचे पाणीपुरवठा मंत्री गुलाबराव पाटील म्हणाले.
पूजा चव्हाण आत्महत्या प्रकरणी भाजपने राज्याचे वनमंत्री संजय राठोड यांचं नाव घेतलं. त्यानंतर संजय राठोड यांनी आज राजीनामा मुख्यमंत्र्यांकडे सोपवल्याची चर्चा रंगू लागली. परंतु राठोड यांच्या राजीनाम्याचं वृत्त खोडसाळपणाचं असल्याचं यवतमाळ जिल्हाप्रमुख पराग पिंगळे यांनी सांगितलं. संजय राठोड यांच्याविषयी गुलाबराव पाटील यांना विचारलं असता ते म्हणाले की, “मुख्यमंत्र्यांनी संजय राठोड यांच्या चौकशीचे आदेश दिले असून चौकशीत दोषी आढळल्यास त्यांच्यावर गुन्हा दाखल होईल.” या प्रकरणाची चौकशी मुख्यमंत्र्यांच्या आदेशानुसार सुरू झाली आहे. चौकशीत काय निष्पन्न होते? त्यानंतर मुख्यमंत्री निर्णय घेतीलच. या प्रकरणाचा तपास सुरू आहे. तपासात काय निष्पन्न होते, ते पाहणे महत्त्वाचे असेल. तपासाआधीच आपण कोणाला शिक्षा करू शकत नाही. तपासात जर काही निष्पन्न झाले तर गुलाबराव पाटीलच नव्हे तर कुणालाही बोलण्याची गरज राहणार नाही. आपोआप गुन्हा दाखल होईल, असेही गुलाबराव पाटील म्हणाले. “हे आरोप आहेत. आरोप झाल्यामुळे त्यांची चौकशी सुरु आहे. राठोड सध्या कुठे आहेत आपल्याला माहित नाही. गेल्या दोन-तीन दिवसांपासून आपण मतदारसंघात व्यस्त आहोत. आज आपण मुंबईला जात आहोत. त्यांची माहिती मिळाली तर आपल्याला सांगेन,” असंही गुलाबराव पाटील म्हणाले.
मंत्री गुलाबराव पाटील यांचे ट्विटर अकाउंट हॅक, पोलिसात तक्रार
दरम्यान जळगाव जिल्ह्याचे पालक मंत्री गुलाबराव पाटील यांचं ट्विटर हॅण्डल हॅक झाल्याचं समोर आलं आहे. समर्थकांनी काल रात्री ही बाब त्यांच्या निदर्शनास आणून दिली. त्यानंतर गुलाबराव पाटील यांनी आज या विषयी पोलिसात तक्रार दिली. पोलीस या घटनेचा तपास करत आहेत.
