धरणगाव (प्रतिनिधी) शहरात आज दुपारी वादळी वाऱ्यासह मुसळधार पावसाने हजेरी लावली. जवळपास अर्धातास झालेल्या पावसामुळे नागरिकांची चांगलीच तारांबळ उडाली. वादळी वाऱ्यामुळे शहरात काही ठिकाणी झाडाच्या फांद्या तुटून विद्युत पोलावर पडल्या. परिणामी, काही भागांतील वीजपुरवठा खंडित झाला होता.
शहरात अनेक नागरिकांच्या घरातील फ्रीज, टीव्हीचे मोठ्या प्रमाणावर नुकसान झाल्याचे कळते. मोठा माळी वाडा परिसरात दोन विद्युत खांबांवर झाड कोसळले. त्यामुळे मोठ्या प्रमाणावर शॉर्ट सर्किट झाल्याने नुकसान झाले आहे. परंतू सुदैवाने या ठिकाणी कोणत्याही प्रकारचे जीवित हानी झाली नाही. परिणामी महावितरणे या ठिकाणी वीज पुरवठा खंडित केला आहे. आज दुपारी तीन वाजेच्या सुमारास अचानक पावसाला सुरवात झाली. ढगांच्या प्रचंड गडगडाटासह पाऊस कोसळला. यामुळे जीवनावश्यक वस्तूंची खरेदीसाठी घराबाहेर पडलेल्यांनाही पावसाचा फटका बसला. त्यामुळे अनेकांना मिळेल त्या ठिकाणी आडोसा शोधावा लागला.
