धरणगाव (प्रतिनिधी) कोरोना उपचारासाठी धरणगाव तालुक्यातील जनतेला वणवण भटकावे लागत आहे. जिल्ह्यातील अन्य नेत्यांनी जसे आपापल्या तालुक्याला अतिरिक्त कोरोना सेंटर उपलब्ध करून दिलेत त्याप्रमाणे धरणगाव तालुक्यातील ना. गुलाबराव पाटील व जिल्हा आरोग्य प्रशासन यांनी २०० ऑक्सिजन व १० व्हेंटिलेटर बेड उपलब्ध करून द्यावेत, त्यामुळे ऑक्सिजन व व्हेंटिलेटर अभावी होणाऱ्या मृत्यूचे प्रमाण कमी होईल. अशी मागणी भारतीय जनता पार्टी धरणगाव शहराच्यावतीने करण्यात आली आहे.
गेल्या महिनाभरापासून धरणगाव शहर व तालुक्यात कोरोना कहरच झाला आहे. धरणगाव शहरातील कोरोना रुग्ण जळगाव, धुळे, नाशिक, एरंडोल, अमळनेर, चोपडा, पारोळा या ठिकाणी जाऊन उपचार घेत आहेत. पण हे सर्वच रुग्णांना शक्य नाही जिल्ह्यातील अनेक नेत्यांनी आपल्या कार्यक्षेत्रात गरजू रुग्णांसाठी कोविड सेंटर उभारले आहेत. त्यात चोपडा येथे अरुणभाई गुजराथी यांनी नगराध्यक्षांच्या सहकार्याने २०० बेडचे कोरोना हॉस्पिटल उभारले. तसेच आ. जयकुमार रावल यांनी १०० बेडच्या हॉस्पिटल शिंदखेडा व १०० बेडच्या हॉस्पिटल दोंडाईचा याठिकाणी उभारले. तसेच आ. चिमणराव पाटील यांनी एरंडोल व पारोळा तालुक्यातील ७ आरोग्य केंद्रांना प्रत्येकी १० असे ७० ऑक्सीजन बेड दिले.
जिल्ह्यातील माजी पालकमंत्री आरोग्यदूत गिरीश भाऊ महाजन यांनी जी. एम. फाउंडेशनच्या माध्यमातून जामनेर तालुक्याच्या गरजू लोकांसाठी कोरोना हॉस्पिटल व जी. एम. डायग्नोस्टिक सेंटर जळगाव येथे सुरु केले आहे. तसेच आपल्या जिल्ह्याचे माजी पालकमंत्री देवकर आप्पा यांनी आपल्या मेडिकल कॉलेजमध्ये कोविड सेंटर सुरू केले आहे. अशाच प्रकारची सुविधा ना. पालकमंत्री गुलाबराव पाटील यांनी आपल्या तालुक्यातील गरजू रुग्णांसाठी करावी, अशी मागणी भारतीय जनता पार्टीच्यावतीने करण्यात आली आहे.
