धरणगाव (प्रतिनिधी) माहिती अधिकार कार्यकर्ते अनिल देवराम ओचावर यांचा निर्घृण खून करणाऱ्यांना कठोर शिक्षा व्हावी. त्याचप्रमाणे हत्या झालेल्या ओचावर कुटुंबीयांना १० लक्ष रुपये आर्थिक मदत शासनाने जाहीर करावी अशी मागणी धरणगाव तालुका माहिती अधिकार कार्यकर्ता महासंघाच्या पदाधिकाऱ्यांनी मा.नायब तहसिलदार लक्ष्मणराव सातपुते यांना दिलेल्या निवेदनाद्वारे केली आहे.
सविस्तर असे की, यवतमाळ जिल्ह्यातील पारवा गावातील माहिती अधिकार कार्यकर्ते अनिल देवराव ओचावार यांची १५ मे २०२२ रोजी मध्यरात्री अतिशय क्रूर पद्धतीने हत्या करण्यात आली. माहिती अधिकार अधिनियमानुसार माहिती मागीतली म्हणून सूड भावनेने सदर क्रूर हत्या झाल्याचे पोलीसांच्या प्राथमिक तपासातून आणि प्रसार माध्यमातून समोर आले आहे. सदर घटना ही धक्कादायक असून महाराष्ट्राच्या प्रागतिक परंपरेला काळीमा फासणारी आहे. शासन व प्रशासन भ्रष्टाचार मुक्त, लोकाभिमूख व पारदर्शक चालावे म्हणून काम करणाऱ्या हजारो माहिती अधिकार कार्यकर्त्यांचे जागरूक व संवदेनशील नागरिकांचे मनोधर्य खच्ची करणारी घटना आहे. सदर घटनेच्या पार्श्वभूमीवर माहिती अधिकार कार्यकर्ता महासंघ, महाराष्ट्र यांनी निवेदनात नमूद केले आहे की, १. मृत अनिल देवराव ओचावार यांचा खटला फास्ट ट्रॅक कोर्टात चालवून दोषी आरोपींना सहा महिन्याच्या आत कठारातील कठोर शिक्षा मिळावी. २. या प्रकरणात व कटात सामील असू शकणारे व अपराध्याला चिथावणी देणारे सरकारी अधिकारी व सूत्रधार यांच्याही मुसक्या आवळाव्यात आणि त्यांना आरोपी करून कसून चौकशी करावी. ३. माहिती अधिकार कार्यकर्ता म्हणून जीव धोक्यात घालून काम करून प्रशासन व शासन पारदर्शक चालावे म्हणून आपल्या जीवाची बाजी लावणाऱ्या मृत कार्यकर्ता अनिल देवराव ओचावार यांच्या कुटुंबियांना किमान दहा लाख रूपयांची अर्थिक मदत सरकारने जाहिर करावी. ४. माहिती अधिकार कार्यकर्त्यांना धमक्या देणे, हल्ले करणे, मारहाण होणे व त्यांच्या हत्या होणे अशा घटनांमध्ये वरचेवर वाढ होत आहे. ही गंभीर बाब आहे. माहिती अधिकार कार्यकत्यांची सुरक्षा व सरंक्षण या सबंधी शासनाने धोरणात्मक उपाययोजना अंमलात आणणे आवश्यक आहे. शासनाने या संबंधी कडक उपाय योजना कराव्यात. ५. माहिती अधिकार कार्यकर्त्यांना आवश्यक तेथे तातडीने पोलीस संरक्षण मिळणे अत्यावशक आहे. वरील मागण्यांचा प्रशासनाने गंभीरपणे विचार करून अंमलबजावणी करावी. अश्या स्वरूपाचे निवेदन उत्तर महाराष्ट्र अध्यक्ष ॲड.आशिष बाचपाई, उत्तर महाराष्ट्र संघटक जितेंद्र महाजन, विभागीय जिल्हाध्यक्ष राजेंद्र वाघ, संघटक प्रभाकर ठाकूर, संपर्क प्रमुख प्रमोद जगताप, मा.अ. कार्यकर्ते निलेश पवार, मयूर भामरे, विलासराव कढरे आदिंनी धरणगावचे नायब तहसिलदार लक्ष्मणराव सातपुते यांना सादर केले.
