औरंगाबाद (वृत्तसंस्था) विधान परिषदेच्या निवडणुका जवळ आल्यामुळे सध्या राज्यातील वातावरण चांगलंच तापलं आहे. विधान परिषदेसाठी भाजपकडून पाच उमेदवारांना संधी देण्यात आली आहे. त्याचवेळी भाजपकडून विधान परिषदेसाठी पंकजा मुंडे (Pankja Munde)यांना डावलण्यात आलं आहे. यावरुन पंकजा मुंडे यांचे समर्थक आक्रमक झाले आहेत. त्यांनी औरंगाबादमधील भाजप कार्यालयावर मोर्चा काढला आहे.
औरंगाबादेत पंकजा मुंडे समर्थक भाजप कार्यालयावर चालून आले. यावेळी पंकजा नाही तर भाजपही नाही, अशा घोषणा कार्यकर्त्यांनी दिल्या. इतकंच नाही तर, कार्यकर्त्यांनी देवेंद्र फडणवीस यांच्याविरोधात घोषणाही दिल्या. यावेळी कार्यकर्त्यांकडून भाजपच्या कार्यालयावर दगडफेकही करण्यात आली. या दगफेकीत कार्यालयाचे नुकसान झाले आहे. दरम्यान या कार्यकर्त्यांना पोलिसांना ताब्यात घेतलं आहे.
भाजपने विधान परिषद निवडणुकीसाठी पाच अधिकृत आणि अपक्ष एक अशा सहा उमेदवारांची घोषणा केली. भाजपकडून विधानपरिषदेत पंकजा मुंडे यांना उमेदवारी दिली जाणार अशी जोरदार चर्चा होती. पण भाजपने जाहीर केलेल्या यादीत पंकजा मुंडे यांच्या नावांचा समावेश नव्हता. त्यामुळे पंकजा मुंडे समर्थक नाराज झाले होते. आज कार्यकर्त्यांनी परभणीसह भाजपच्या औरंगाबादमधील कार्यालयावर राडा घातला.
दरम्यान, भाजपकडून विधानपरिषद विरोधी पक्षनेते प्रवीण दरकेर, माजी मंत्री राम शिंदे, भाजप महाराष्ट्राचे संघटन सचिव श्रीकांत भारतीय, भाजप महिला मोर्चाच्या अध्यक्षा उमा खापरे, राज्य भाजपचे उपाध्यक्ष प्रसाद लाड आणि अपक्ष उमेदवार सदाभाऊ खोत यांची नावे जाहीर करण्यात आली आहे. मिळालेल्या माहितीनुसार, कालपासून पंकजा मुंडे नॅाट रिचेबल आहेत. कालपासून आपण त्यांच्यासोबत संपर्क करण्याचा प्रयत्न करत आहोत. दोन दिवस पंकजा मुंडे बोलणार नाहीत अशी माहिती पंकजा मुंडे यांच्या कार्यालयाकडून देण्यात आली आहे.
