रावेर (प्रतिनिधी) येथील ७० वर्षीय वृद्धाला शिवीगाळ करून ५०० स्केअर फुट जागा घेवून द्या अथवा ५ लाख रुपये द्या, अशी धमकी देत खंडणीची मागणी केल्याप्रकरणी रावेर पोलीस ठाण्यात एका दापत्याविरुद्ध न्यायालयाच्या आदेशान्वये गुन्हा दाखल करण्यात आला आहे.
यासंदर्भात धोंडू रायपूरकर (वय ७० रा. रावेर) यांनी दिलेल्या फिर्यादीनुसार, धोंडू रायपूरकर यांच्या घराच्या बाहेर गल्लीत पवन कपिल शर्मा (वय ४५) व सपना कपिल शर्मा (वय ३४, रा. हनुमान मंदिराजवळ गांधी चौक रावेर) यांचा मुलगा व गल्लीतील लहान मुले क्रिकेट खेळत होते. रायपूरकर यांनी त्यांना मैदानात जाऊन क्रिकेट खेळा, असे सांगितले. यावरून पवन शर्मा याने रायपूरकर यांना अश्लील शिवीगाळ केली. तसेच तुला बाहेर काढुन मारेल. तुझे घर खाली करणार नाही. तुझ्याकडुन जे होईल ते कर, अशी धमकी दिली. पवन शर्मा याची पत्नी सपना शर्मा हिने रायपूरकर व त्यांची सून कांचन रायपुरकर व भारती किशोर रायपुरकर यांना अश्लील शिवीगाळ करुन जिवे मारण्याची धमकी दिली. त्यावेळी त्यांना घर खाली करण्याबाबत सांगितले असता सपना शर्मा हिने स्वतः पेटवून घेईल व तुमचे नांव सांगुन फसवेल, अशी धमकी दिली. एवढेच नव्हे तर दोघे सुनेला मारण्यासाठी अंगावर धावून आल्याचे देखील धोंडू रायपूरकर यांनी आपल्या फिर्यादीत म्हटले आहे.
सुमारे २ वर्षापासुन रायपूरकर हे शर्मा यांना घर खाली करण्याबाबत सांगत होते. परंतू शर्मा दाम्पत्य रायपूरकर यांना तुम्हास खोट्या गुन्ह्यात फसवू, अब्रू नुकसानीचा दावा दाखल करू, अशी धमकी देत होते. तसेच आम्हाला ५०० स्केअर फुट जागा घेवून द्या अथवा ५ लाख रुपये द्या, अशी धमकी देवून खंडणीची मागणी केली. याप्रकरणी रावेर पोलीस ठाण्यात दोघांविरुद्ध न्यायालयाच्या आदेशान्वये १५६ (३) नुसार गुन्हा दाखल करण्यात आला असून पुढील तपास सफौ ईस्माईल शेख हे करीत आहेत.
