जळगाव (प्रतिनिधी) – दहा हजार रुपयांच्या गुंतवणुकीवर हजार रुपयांचा नफा देत विश्वास संपादन केला. त्यानंतर सेवानिवृत्त बॅक अधिकारी जगदिश श्रीराम सनेर (वय ६२, रा. आदर्शनगर) यांच्याकडून वेळोवेळी रक्कम उकळून घेत त्यांची ७ लाख ५८ हजारात ऑनलाईन फसवणुक केली. ही घटना उघडकीस आल्यानंतर सनेर यांनी सायबर पोलिसात तक्रार दिली. त्यानुसार ऑनलाईन ठगांविरुद्ध गुन्हा
दाखल करण्यात आला आहे.
शहरातील एका बँकेतून निवृत्त झालेले जगदीश सनेर यांना दि. ३ जानेवारी रोजी अॅक्सिस सिक्युरिटीज टिमच्या असिस्टंट आशीमा भट असे नाव असलेल्या मोबाईल क्रमांकावरून मेसेज आला. त्यात ही टीम शॉर्ट टर्म स्टॉक ट्रेडिंगचे काम करते असे नमूद करून गुंतवणुकीविषयी सांगण्यात आले. सुरुवातीला सनेर यांनी नकार दिला, मात्र वारंवार मेसेज येऊ लागल्याने दि. ६ जानेवारी रोजी अॅक्सिस सिक्युरीटीजच्या शॉर्ट टर्म स्टॉक ट्रेडिंगमध्ये त्यांनी नोंदणीसाठी संमती दिली. त्यात १० हजार रुपये गुंतविल्यानंतर त्यांना ९३६ रुपये नफा देण्यात आला.
पत्त्यावर आढळले नाही कार्यालय
मॅनेजमेंट फि भरण्यास सनेर यांनी नकार दिला असता त्यांना ब्लॉक करण्यात आले. सनेर हे लेटर हेडवर असलेल्या पत्त्यावर गेले असता तेथे अॅक्सिस सिक्युरीटीजच्या शॉर्ट टर्म स्टॉक ट्रेडिंगचे कोणतेही कार्यालय नव्हते या प्रकरणी जगदीश सनेर यांनी सायबर पोलिस ठाण्यात फिर्याद दिली. त्यावरून आशिमा भट व त्यांचे वरीष्ट अतुल मेहरा यांच्याविरुद्ध गुन्हा दाखल करण्यात आला आहे. तपास पोलिस निरीक्षक प्रदीप ठाकूर करीत आहेत.
१ लाखांच्या शेअर्सचे झाले ६ लाख विश्वास संपादन झाल्यानंतर सनेर यांनी दि. २७ जानेवारी रोजी एका कंपनीच्या आयपीओमध्ये १ लाख रुपये गुंतविले. त्याबदल्यात त्यांना २८ हजार शेअर्स देण्यात आले. त्याची किंमत ७ लाख ८४ रुपये झाल्याने सनेर यांनी दि. ३० जानेवारी रोजी ६ लाख ५८ हजार रुपये उत्तरप्रदेशातील एका बँक खात्यात पाठविले.
मॅनेजमेंट फी म्हणून ५ लाखांची मागणी
जगदीश सनेर यांनी दोन वेळा मोठी रक्कम गुंतविल्यानंतर त्यांच्या खात्यात ३५ लाख २६ हजार ९१२ रुपये जमा झाल्याचे त्यांना दिसत होते. त्यांनी ८ लाख ५० हजार रुपये काढण्याविषयी सांगितले असता त्यासाठी मॅनेजमेंट फी म्हणून ५ लाख रुपयांची मागणी करण्यात आली.
