जळगाव (प्रतिनिधी) – दिव्यांग तक्रारदाराच्या कारचे कायमस्वरुपी पासिंग करण्यासाठी खान्देश मोटर्स शो-रुममधील खासगी एजंट योगेश रामभाऊ पाटील (वय ३९, रा. आदर्शनगर) याने आरटीओ कार्यालयातील साहेबांसह तेथील कर्मचाऱ्याला सात हजारांच्या लाचेची मागणी करुन ती स्विकारली. ही घटना दि. १७ ऑगस्ट रोजी आरटीओ कार्यालयात घडली. याप्रकरणी एजंटला लाचलुचपत प्रतिबंधक विभागाने ताब्यात घेतले असून त्याच्याविरुद्ध गुन्हा दाखल करण्यात आला आहे.
तक्रादार हे दिव्यांग असून त्यांनी दि. १ जुलै रोजी खान्देश मोटार शो-रुम येथून कार खरेदी केली होती. कारची दि. ३ ऑगस्ट रोजी शोरुमचे खासगी एजंट योगेश पाटील यांच्या मार्फत आरटीओ ऑफिसमध्ये तात्पुरते रजिस्ट्रेशन केले होते. त्यानंतर तक्रारदार हे दिव्यांग असल्यामुळे कारमध्ये हॅडकीट बसविल्यानंतर ते दि. १२ ऑगस्ट रोजी आरटीओ कार्यालयात कारची कायमस्वरुपी पासिंग करण्यासंदर्भात विचारपूस करण्यासाठी गेले. त्याठिकाणी खासगी एजंट योगेश पाटील याने आरटीओ कार्यालयातील साहेब व संबंधित टेबलचे कर्मचाऱ्यांकडून काम करुन आणून देण्याच्या मोबदल्यात १० हजारांची लाचेची मागणी केली होती.
पडताळणीनंतर टाकला छापा
तडजोडीअंती साडेआठ हजार रुपये ठरल्यानंतर तक्रारदार यांनी दि. १७ ऑगस्ट रोजी लाचलुचपत प्रतिबंधक विभागाकडे तक्रार केली. त्यानुसार पडताळणी केली असता सात हजार रुपयांच्या लाचेची मागणी करुन ती स्विकारतांना पथकाने छापा टाकला. याप्रकरणी एमआयडीसी पोलीस ठाण्यात गुन्हा दाखल करण्यात आला असून लाचखोर योगेश पाटील याला रात्री उशिरा अटक करण्यात आली.
