जळगाव (प्रतिनिधी) शहरात सकाळच्या सुमारास फिरण्यासाठी गेलेल्या दाम्पत्याला भरधाव वेगाने येणाऱ्या स्कूलबस वरील चालकाने धडक दिल्याने पतीचा जागीच मृत्यू झाला आहे. तर पत्नी गंभीर जखमी झाली आहे. गफ्फार सुलेमान पिंजारी (वय-५४ रा. सुप्रिम कॉलनी, जळगाव) असे मयत झालेल्या व्यक्तीचे आहे.
यासंदर्भात अधिक असे की, सुप्रीम कॉलनीतील रहिवासी गफ्फार पिंजारी हे पत्नी रईसावी सोबत नेहमी प्रमाणे सोमवारी २५ एप्रिल रोजी सकाळी ६ वाजता राष्ट्रीय महामार्गावरील रस्त्यावर मॉर्निंग वॉकसाठी गेले होते. राष्ट्रीय महामार्गावरील नेक्सा शोरूम समोर पिंजारी दाम्पत्य पायी जात असतांना मागून (एमएच १९ डीवाय ९०३४) या क्रमांकाच्या टाटा मॅजीक स्कूलबसने त्यांना जोरदार धडक दिली. या धडकेत गफ्फार पिंजारी हे जागीच ठार झाले तर त्यांची पत्नी रईसावी ह्या गंभीर जखमी झाल्या. त्यांना खासगी रुग्णालयात दाखल करण्यात आले आहे. घटनेची माहिती मिळाल्यानंतर स्थानिक नागरीकांनी धाव घेतली. जिल्हा रुग्णालयात दाखल केले असता गफ्फार पिंजारी यांना वैद्यकीय अधिकारी यांनी मयत घोषीत केले. मयताच्या पश्चात चार मुले, दोन मुली असा परिवार आहे. याप्रकरणी जाफर गफ्फार पिंजारी यांच्या फिर्यादीवरून एमआयडीसी पोलीस ठाण्यात गुन्हा दाखल करण्यात आला आहे.
