मुंबई (वृत्तसंस्था) कोरोना रुग्णांच्या संख्येत झपाट्यानं वाढ होताना दिसत आहे. याचा परिणाम बॉलिवूडमध्येही पाहायला मिळत आहे. त्यानंतर आता ज्येष्ठ संगीतकार बप्पी लहरी यांनाही कोरोनाची लागण झाली आहे. उपचारासाठी त्यांना मुंबईतील ब्रीच कँडी रुग्णालयात दाखल करण्यात आलं आहे.
बप्पी लहरी यांच्या कुटुंबातील सदस्यांनी सर्वांना विनंती केली आहे की, बप्पी यांच्या संपर्कात आलेल्या प्रत्येकानं एकदा आपली कोरोना चाचणी करुन घ्यावी. बप्पी लहरी यांची मुलगी रेमा लहरी बंसल हिनं सांगितलं की बप्पी दा यांनी सतत कोरोना नियमांचं पालन केलं आणि तेवढीच काळजीही घेतली मात्र तरीही त्यांना कोरोनाची लागण झाली.
कोरोनाची काही लक्षणं जाणवल्यानंतर त्यांची तपासणी केली असता रिपोर्ट कोरोना पॉझिटिव्ह आला. त्यांचं वय लक्षात घेता संपूर्ण कुटुंबानं त्यांना डॉक्टरांच्या निरीक्षणाखाली ठेवण्याचा निर्णय घेतला आहे. त्यामुळे, त्यांना रुग्णालयात दाखल करण्यात आलं आहे. रेमा लहरी यांनी सांगितलं, की लवकरच ते घरी पुन्हा येतील. यासोबतच बप्पी यांच्या प्रकृतीसाठी प्रार्थना करणाऱ्याचे रेमानं आभारही मानले.