इस्लामपूर (वृत्तसंस्था) वाघवाडी फाटा-इस्लामपूर रस्त्यावर झोपलेल्या हर्षवर्धन नागनाथ पाथरवट ( वय १३) या शाळकरी मुलाचा मृतदेह सापडल्याने एकच खळबळ उडाली आहे. हर्षवर्धनची डोक्याची कवटी फुटली आहे. धक्कादायक म्हणजे हर्षवर्धनच्या बाजुला झोपलेले दोघेही सुरक्षित आहेत, हे विशेष !
वाघवाडी ते इस्लामपूर रस्त्यावर अभियंता नगरमध्ये कृषी महाविद्यालयाच्या कुंपणाचे काम सुरू आहे. तेथे भिंतीलगत पाथरवट समाजाचे नागरिक गेली अनेक वर्षे दगड घडवण्याचे काम करत असतात. या दगड काम करणाऱ्यांमधील तिघेजण रात्री रस्त्यावर झोपले होते. त्यापैकी एकाचा झोपलेल्या स्थितीमध्ये आज सकाळी मृतदेह मिळल्याने एकच खळबळ उडाली. मृतदेहाच्या बाजुला झोपलेले दोघेही सुरक्षित तसेच मृतदेहाची अर्धी कवटी गायब असल्यामुळे हा प्रकार घातपात की अपघात?, याबाबत उलटसुलट चर्चा सुरू झाली आहे. पोलिसांनी याबाबत तपास सुरु केला असला तरी अर्धी कवटी गायब असल्याने नेमका काय प्रकार आहे, हे अद्याप समजलेले नाही. परंतू या घटनेमुळे प्रचंड खळबळ उडाली आहे.
