सांगली (वृत्तसंस्था) सांगली-मिरज रस्त्यावरील मार्केट यार्डजवळील रिलायन्स ज्वेल्स या शोरूमवर भरदिवसा गोळीबार करीत आठ ते दहा दरोडेखोरांनी सिनेस्टाईल दरोडा टाकत साधारण १३ कोटींचे दागिने लुटून नेल्याने प्रचंड खळबळ उडाली आहे. दरोडेखोरांनी पोलीस असल्याची बतावणी करून शोरूममध्ये प्रवेश मिळवीत कर्मचाऱ्यांचे हात-पाय, तोंड बांधून ठेवत लुटपाट केली. दरम्यान, घटनेची माहिती मिळताच पोलिसांनी जिल्ह्यात सगळीकडे नाकाबंदी केली.
पोलिस असल्याचे सांगत शोरूममध्ये शिरले !
मार्केट यार्डजवळ वसंत कॉलनीत तसेच जिल्हा पोलिस मुख्यालयापासून अवघ्या दोन हजार फुटांवरील रिलायन्स ज्वेल्स हे सोन्या-चांदीच्या दागिन्यांचे शोरूम आहे. रविवारी दुपारी तीनच्या सुमारास पाच ते सहा दरोडेखोर एका वाहनातून आले. पोलिस असल्याचे सांगत ते शोरूममध्ये शिरले. त्यानंतर आम्हाला तपासणी करायची असल्याचे सांगत शोरूम व्यवस्थापकासह कर्मचाऱ्यांना एका ठिकाणी जमा केले. त्यानंतर बंदुकीच्या धाकावर २० कर्मचाऱ्यांचे हात, पाय, तोंड चिकटपट्टीने बांधले. तर शोरूममधील दोघांना शोकेसमधील सोने-चांदीचे दागिने बॅगेत भरण्यास सांगितले. अवघ्या पंधरा ते वीस मिनिटांत त्यांनी संपूर्ण शोरूम खाली केले.
हिऱ्यांचे दागिने भरलेली बॅगे शोरूममध्येच सोडली !
दरोडेखोर दागिने बॅगेत भरून पळ काढण्याच्या तयारीत असतानाच एका ग्राहकाने शोरूममध्ये प्रवेश केला. यातील दृश्य बघताच त्याने आरडाओरडा सुरू करत शोरूम बाहेर पळ काढला. आता लोकं जमा होतील, या भीतीने दरोडेखोरांनी दागिन्यांनी भरलेल्या बॅगा घेऊन जाताना आपल्याला कुणी विरोध करू नये यासाटी काचेच्या दरवाजावर गोळीबार केला आणि वाहनातून पलायन केले. परंतू या घाई गडबडीत दरोडेखोरांनी हिऱ्याचे दागिने भरलेली बॅगे मात्र, शोरूममध्येच सोडून दिली. दरम्यान, दरोडेखोरांनी दुकानातील सर्व सीसीटीव्ही कॅमेरे फोडले. तसेच पोलिसांनी आपली ओळख पटू नये, यासाठी सीसीटीव्ही कॅमेऱ्यांचे फुटेज जमा होणारे ५ पैकी ४ उपकरणेही दरोडेखोरांनी सोबत नेली.
१५ किलो सोने पोत्यात भरून पसार !
रिलायन्सच्या शोरूममधील जवळपास १५ किलो सोने दरोडेखोरांनी पोत्यात भरले. तसेच जवळपास दीडशे विविध रत्ने पेटीत टाकून पुन्हा गोळीबार करत पसार झाले. १०-१२ किलो सोने व ३-४ कोटींची रत्ने दरोडेखोरांनी लुटली आहेत. दरोड्याची माहिती मिळताच पोलिस अधीक्षक डॉ. बसवराज तेलींसह पोलिस घटनास्थळी दाखल झाले. दरोडेखोर एका स्कॉर्पिओ गाडीतून घटनास्थळी आले होते. दरोडेखोर सोलापूर किंवा कर्नाटकाकडे पळाले असल्याचा अंदाज वर्तविण्यात आला आहे.
