नवी दिल्ली (वृत्तसंस्था) सीरम इन्स्टिट्यूट ऑफ इंडियाने कोव्हिशील्ड या कोरोनाव्हायरस लस चाचणीत सहभागी झालेल्या स्वंयसेवकाविरुध्द १०० कोटींचा मानहानीचा खटला दाखल करणार असल्याचं म्हटलं आहे. रविवारी संध्याकाळी सीरम इन्स्टिट्यूट दिलेल्या एका निवेदनात म्हटलं आहे की, सीरम इन्स्टिट्यूटला स्वयंसेवकाच्या वैद्यकीय स्थितीबद्दल सहानुभूती आहे, पण लसीकरण चाचणीचा त्याच्या स्थितीशी काहीही संबंध नाही. याबद्दलची बातमी एनडीटीव्हीने दिली होती.
दरम्यान, सीरम इन्स्टिट्यूटची लस घेतल्यानंतर मेंदुशी संबंधित त्रास झाल्याने लस घेतलेल्या एका स्वयंसेवकाने पाच कोटी रुपयांची नुकसान भरपाई मागितली. यासंबंधी त्यांचे वकील एनजीआर प्रसाद यांनी ही माहिती दिली आहे. आपल्या आशिलाला लसीच्या चाचणीचा डोस दिल्यानंतर त्यांच्यात मेंदुविकाराशी संबंधित गुंतागुंत निर्माण झाली. त्यामुळे नुकसान भरपाईसाठी सीरम इन्स्टिट्यूट, इंडियन कौन्सिल फॉर मेडिकल रिसर्च, ऍस्ट्राझेन्का, ड्रग्ज कंट्रोलर ऑफ इंडिया, या लसीच्या संशोधन विभागाचे प्रमुख ऍन्ड्य्रू पोलार्ड यांना आम्ही नोटीस बजावली असल्याचे प्रसाद यांनी सागितले. ही नोटीस आम्ही 21 नोव्हेंबरला बजावली आहे.
याबाबत सीरम इन्सिट्टयूटशी संपर्क साधला असता, या स्वयंसेवकाला नेमका कशामुळे मेंदुविकाराचा त्रास झाला याचा शोध घेण्याचे काम सुरू आहे. ती तपासणी पूर्ण झाल्यानंतर त्याबाबत अधिक भाष्य करता येईल,असे त्या संस्थेच्या प्रवक्‍त्याने स्पष्ट केले.
