कोल्हापूर (वृत्तसंस्था) तीन वर्षांच्या आपल्या नातीला मांडीवर घेऊन आजोबाने तिचे लैंगिक शोषण केले. नातीला त्रास होऊ लागल्यानंतर आईने सीपीआर रुग्णालयात दाखल केले. तेथे डॉक्टरांनी वैद्यकीय तपासणी केल्यानंतर हा गंभीर प्रकार उघड झाला. साठ वर्षांच्या नराधम आजोबाला पोलिसांनी अटक केली आहे. तर, नातीवर उपचार सुरू आहेत. आजोबा-नातीच्या संबंधांना काळिमा फासणारी घटना करवीर तालुक्यातील एका गावात घडली.
करवीर तालुक्यातील एका गावात राहणारा ६० वर्षांचा आजोबा दररोज आपल्या तीन वर्षांच्या नातीला घेऊन फिरायचा. तिला खाऊ देत होता. इवल्याशा नातीवर त्याची नराधम नजर पडत होती. २७ ऑक्टोबर रोजी रात्री घरातील सर्वजण झोपलेले असताना खेळवण्याच्या बहाण्याने आजोबाने नातीला उचलून नेऊन बाहेरच्या खोलीत तिचे लैंगिक शोषण केले. दुसऱ्या दिवशी या बालिकेस त्रास होऊ लागला. मात्र, आईने फारसे लक्ष दिले नाही. पण, हे प्रकरण काहीतरी वेगळे दिसते असे आईच्या लक्षात आल्यानंतर तिने मंगळवारी दुपारी सीपीआर रुग्णालयात येऊन उपचार घेतले. यावेळी वैद्यकीय पथकाने या बालिकेची तपासणी केली. तिला एकटीला बाजूला घेऊन विचारणा केल्यानंतर आजोबाने जो घाणेरडा प्रकार केला तो चिमुकलीन हातवारे करून सांगितला. या मुलीची ही अवस्था पाहून डॉक्टरही काही मिनिटे स्तब्ध झाले.
डॉक्टरांनी पीडित बालिकेच्या पालकांना हा प्रकार सांगितला, तेव्हा त्यांनाही धक्का बसला. ६० वर्षांचा आजोबा असे कृत्य करेल यावर त्यांचा विश्वास बसत नव्हता. डॉक्टरांनी सीपीआर पोलीस चौकीतील पोलिसांना घटनेची माहिती दिली. त्यानंतर करवीर पोलीस ठाण्यात फोन करून याबाबत सांगितले. पोलीस निरीक्षक किशोर शिंदे यांच्यासह पथक तातडीने सीपीआर रुग्णालयात दाखल झाले. पीडित बालिकेच्या आईचा जबाब नोंदवून तक्रार दाखल करण्याचे काम रात्री उशिरापर्यंत सुरू होते. नराधम आजोबाला पोलिसांनी तातडीने ताब्यात घेतले.
