अकोला (वृत्तसंस्था) शौचास जाते म्हणून घरातून मागील दोन दिवसापासून बेपत्ता असलेल्या 19 वर्षीय तरुणीचा हात ओढणीने बांधलेल्या अवस्थेत मृतदेह काटेरी झुडपात आढळल्याने परिसरात प्रचंड खळबळ उडाली आहे. गळा आवळून आणि त्यानंतर हातपाय बांधून युवतीला फेकून देण्यात आल्याचा संशय व्यक्त होत आहे. दरम्यान, श्वान पथकाच्या मदतीने पोलिसांनी संशयीत आरोप ताब्यात घेतले असून त्याचे कसून चौकशी सुरू आहे.
पातूर तालुक्यातील ग्राम शिला येथील 19 वर्षीय युवती गुरूवारी पहाटे शौचास जाते म्हणून घराबाहेर पडली होती. पहाटेपासून गेलेली मुलगी उशिरापर्यंत घरी परतली नसल्याने तिचा शोध सुरू झाला. कुठेही आढळून न आल्याने युवतीच्या आईच्या तक्रारीवरून पोलिस तपास सुरू असताना शनिवारी पहाटे सुमित्राबाई अंधारे कृषि महाविद्यालय ईमारतीच्या मागील बाजूस इंगळे यांच्या शेताचे काठावर काटेरी झुडपात मृतदेह आढळून आला.
पोलिसांनी घटनास्थळी धाव घेतली असता, हा मृतदेह बेपत्ता असलेल्या युवतीचा असल्याचे उघड झाले. युवतीचे हात-पाय ओढणीने बांधलेले होते. प्रकरणाने गंभीर वळण घेतल्यामुळे अकोलाच्या वरिष्ठ पोलीस अधिकाऱ्यांनी देखील घटनास्थळी धाव घेतली. पोलिसांनी तातडीने श्वान पथकास पाचारण केले. श्वान रेवा हिने मृतक मुलीच्या चप्पलेचा गंध घेत संशयित आरोपीचे घर गाठले. या घरातून आरोपीचा पॅन्ट जप्त करण्यात आली. तसेच संशयिताला ताब्यात देखील घेण्यात आले आहे.
दरम्यान, घटनास्थळी उपविभागीय पोलिस अधिकारी गोकुळ राज, स्थानिक गुन्हे शाखेचे शंकर शेळके, पातूर पोलिस स्टेशनचे किशोर शेळके यांनी भेट दिली होती. तसेच पोलिसांनी पंचनामा करून युवतीचा मृतदेह उत्तरीय तपासणीसाठी अकोला येथील सर्वोपचार रुग्णालयात पाठविला. श्वान पथकाच्या सहकार्याने एका आरोपीला तत्काळ ताब्यात घेण्यात आले आहे. या प्रकरणामध्ये मृत युवतीच्या वडिलांनी फिर्याद दिली असून, आरोपी गजानन सटवाजी बळकार याच्याविरुद्ध गुन्हा दाखल केला आहे. जुन्या वादातून संशयित आरोपीने युवतीचा गळा आवळून खून केल्याची शक्यता व्यक्त करण्यात येत आहे.
